Library
Profile
ନୂତନ ଆରମ୍ଭ
ନୂତନ ଆରମ୍ଭ
ନୂତନ ଆରମ୍ଭ କରିବା ପୂର୍ବରୁ
ବିଷ୍ଣୁ ନାମ ଉଚ୍ଚାରଣ ।
କରିବ ହରି ଅବା ମାଧବ କୁହ
ସର୍ବ କାରଣ କାରଣ ॥୧॥
ସରବ ସାଧବ ନିତ୍ଯ ନିରନ୍ତର
ସର୍ବ କାର୍ଯ୍ୟରେ ମାଧବ ।
ନାମ ସୁମରନ୍ତି ସିଦ୍ଧି ଲଭିଥାନ୍ତି
ମାଧବ ନାମ ଦୁର୍ଲ୍ଲଭ ॥୨॥
ନାମ ସ୍ମରଣରେ ପବିତ୍ର ହୋଇବ
ମସ୍ତକେ ତିଳକ କର ।
ଚନ୍ଦନ ମହାପୁଣ୍ୟ ପାତକ ନାଶେ
ପବିତ୍ର ଆପଦହର ॥୩॥
ପବିତ୍ର ଚନ୍ଦନ ଲକ୍ଷ୍ମୀ ନିବସନ୍ତି
ଚନ୍ଦନ ଧାରଣ କଲେ ।
କାହା କଥା ତୁମେ ଶୁଣିବ କାହିଁକି
କେ ଟାହି ଟାପରା କଲେ ॥୪॥
ଅୟମାରମ୍ଭାୟ ଶୁଭାୟ ଶୁଭଂ
ଭବତୁ ବୋଲି ଉଚ୍ଚାରିବ ।
ପବିତ୍ରୀକରଣ କଲାପରେ ଯାଇ
କଳସଟିଏ ସ୍ଥାପିବ ॥୫॥
କଳସର ଜଳେ ଗଣପତି ଦେବ
ବରୁଣ ଆଦିତ୍ଯ ଆଦି ।
ନବଗ୍ରହ ଇନ୍ଦ୍ର ଦଶଦିଗପାଳ
ଗ୍ରାମଦେବତା ସମ୍ପାଦି ॥୬॥
ଦ୍ଵାଦଶ ଦେବଙ୍କ ପୂଜନ କରିବ
ଯଥାବିଧି ଉପଚାରେ ।
ନୂତନ ଆରମ୍ଭ ପ୍ରୟାସ କରିବ
ଶୁଭ ମଙ୍ଗଳ ବେଳାରେ ॥୭॥
କାୟା ମନ ବାକ୍ଯ ଇନ୍ଦ୍ରିୟ ବୁଦ୍ଧିରେ
ପ୍ରକୃତି ବା ସ୍ବଭାବରେ ।
ଯାହା ବି କରିବ ସବୁ ସମର୍ପଣ
କରିବ ବିଭୁ ପୟରେ ॥୮॥
ନୂତନ ଆରମ୍ଭ ସାକାର ହୋଇବ
ମିିଳିିବ ନବଜୀବନ ।
ବିଭୁ ଆଶୀର୍ବାଦ ଲାଭ କରି ଧନ୍ୟ
ଲଭିବ ତୁମ ଜୀବନ ॥୯॥
