ନବ ଉନ୍ମାଦନା

ସଞ୍ଜୀବନି ସାଜୁ ନୂତନ ବରଷ ନେଇ ନବ ଉନ୍ମାଦନା

ପ୍ରୀତିମୟ ହେଉ ଆଗାମୀ ମୁହୂର୍ତ୍ତ ହରି ଅତୀତ ଯାତନା ।

ବିନ୍ଧାଣୀ ସାଜିଣ ବିନ୍ଧ୍ୟ ହିମାଚଳ ବୁକୁରେ ଲେଖିବି ନାଆଁ

ସାଜି ମନ୍ଦାକିନୀ ପୀରତି ତଟିନୀ ଭରିବି ପ୍ରାଣରେ ନାହା ।

ଅତୀତର ଗ୍ଲାନି ବିରହ ପ୍ଲାବନୀ ପାଶୋରି ନବ ବର୍ଷରେ

ବିଗତ ଗରଳ ହୋଇ ମହାକାଳ ଭୁଞ୍ଜିବି ଅତି ହର୍ଷରେ ।

ପରିବର୍ତ୍ତନ  ହିଁ  ଅପରିବର୍ତ୍ତନ ଭଲ  ଗୁଣ  ଚିରସ୍ଥାୟୀ

କରୁଛି ସଂକଳ୍ପ ନ ରଖି ବିକଳ୍ପ ହେବିନି ଉତ୍ତରଦାୟୀ ।

ପରିମାର୍ଜିତ ହୋଇ ହେବ ପ୍ରକାଶନ ନୂତନ ସଂସ୍କରଣ

ହଟିଯିବ ସର୍ବ ଦୋଷ ଦୂର୍ବଳତା ଭରି ମନେ ଜାଗରଣ ।

ଶୋକ ସନ୍ତାପିତ ବିଭୁ ପଦେ ଚିତ୍ତ କରେ ଏତିକି ମାଗୁଣି

ଜଗୋଦ୍ଧାରଣ ପରମ କାରଣ ଦିଅ ପ୍ରେମର ବୀଜ ବୁଣି ।

ଅପୂର୍ବ ପୁଲକେ ଅପୂର୍ବ ମହକେ ସୁଗନ୍ଧିତ ହେଉ ଧରା

ଅମୃତ ସୃଜନେ ବିଷ ବିସର୍ଜନେ ଝରୁ ଥାଉ ପ୍ରେମ ଧାରା ।