ନୂଆ ପ୍ରେମ ଓ ସ୍କୁଲଦିନ

ମନେ ଅଛିନା ସେଦିନ କଥା ତୁମର

ବର୍ଷାରେ ଜାଣିଶୁଣି ଭିଜି ଭିଜି

ଡଙ୍ଗା ଭସାଇବା ବାହାନାରେ 

ବିଦ୍ୟାଳୟେ ଡେରିରେ ପହଁଞ୍ଚିବା

ପ୍ରଧାନଶିକ୍ଷକଙ୍କ ନାଲି ଆଖି ବେତମାଡ

ବାରଣ୍ଡାରେ ଗୋଡ ତଳେ ଗୋଡି ଦେଇ

କାନ ଧରି ଆଣ୍ଠେଇବା କଥା

ସାହିତ୍ୟର ସରଳାର୍ଥ ଆସେନି ବୋଲି ମୋତେ

ଖାତା କରିଦିଅ ଅଦଳବଦଳ

ଗଣିତରେ ତୁମେ କିନ୍ତୁ ଥିଲ ଦୁର୍ବଳ

ଗଣିତ ବଦଳେ ସାଉଁଟୁଥିଲି

ତୁମ ପାଖରୁ ସାହିତ୍ୟର ପ୍ରଶ୍ନୋତ୍ତର

କଅଁଳ ବୟସ ଡାଳେ ଗଜରୁଥିଲା

ନୂଆନୂଆ ଆମର ପ୍ରେମର କଢିପତ୍ର

ଗୋଟିଏ ଛତା ତଳେ ଦୁହେଁ 

ଖୁବ ପାଖାପାଖି ଚାଲୁଥିଲୁ 

ଲାଜ ଲାଜ ଚାହାଣୀରେ 

ରହୁଥିଲୁ ଚାହିଁ କଣେଇ କଣେଇ ପରସ୍ପର

ପ୍ରେମକୁ ଭଲ ଭାବେ ବୁଝିନଥିବା ମନ

ରାତିରେ ଦେଖୁଥିଲା ଅନେକ ସପନ

ମନେ ଲାଗୁଥିଲା ଏକ ଅପୂର୍ବ ଶୀହରଣ

ନୂଆ ନୂଆ ଉଠୁଥିବା ନିଶଉଠା ବୟସେ

କହିହୁଏନି କିଛି ଲାଜେ ମରୁଥାଏ ନିତି

ମୁଣ୍ଡ ଉପରେ କିନ୍ତୁ ଖଣ୍ଡାଟିଏ ଝୁଲୁଥାଏ ମାଟ୍ରିକ ପରୀକ୍ଷାର

ତୁମକୁ କେହି କଲେ ଅଶ୍ଳୀଳ ଇଙ୍ଗିତ

ଛାତି କାହିଁ ପାରେନି ସହି ମୋର

ତୁମେ ମୋପାଇଁ ଥିଲ 

ଜୀବନେ ପ୍ରଥମ ଆଉ ଶ୍ରେଷ୍ଟତମ ଉପହାର 

ତମ ଆଉ ମୋ ଭିତରେ ଥିଲା

ଖୁବ ପ୍ରତିଦ୍ଵନ୍ଦୀ ମନୋଭାବ 

କେତେବେଳେ ତୁମେ ପ୍ରଥମ ନହେଲେ ମୁଁ ପ୍ରଥମ

ପ୍ରଥମରୁ ଦଶମ ଶ୍ରେଣୀଯାକ 

ଖରାଛାଇ ଭଳି ହାତ ଧରାଧରି ହୋଇ

ସାରିଦେଲୁ ପଢା ସମୟ ତକ ବିଦ୍ୟାଳୟର  

ଆଜି କାହିଁ ଫେରିବାକୁ ଭାରି ଇଚ୍ଛାହୁଏ

ଭୁଲିହୁଏନା ତୁମ ମୋ ଭିତରେ ଥିବା 

ଦୁର୍ବଳ ମୂହୁର୍ତ୍ତମାନ ସବୁ ସେଦିନର