ନୂଆ ଏକ ରୂପ
ନୂଆ ଏକ ରୂପ
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ଅଭିମାନ ସବୁ ଢ଼ାଳି ଦେଉଛି ମୁଁ
ତୁମରି ପାଦ କମଳେ,
ତୁମ ସ୍ୱରୂପରେ ରଖିଣ ମୋ ଧ୍ୟାନ
ଭକ୍ତିର ଅଞ୍ଜଳି ଢାଳେ ।
ହୋଇନପାରେ ମୁଁ ପୂଣ୍ୟ ମନ୍ଦାକିନୀ
ପବିତ୍ର ଗଙ୍ଗାର ଧାରା,
ହୋଇ ତ ପାରିବି ତୁମ ପଦ ଦାସୀ
କରୁଣାରେ ତୁମେ ଭରା ।
ହୋଇନପାରେ ମୁଁ ସଜଫୁଲଟିଏ
ଆଖିକୁ ମୋହିବା ପାଇଁ,
ଜୀବଦାନ ତୁମେ ଦେଇଛ ମନକୁ
ସୁନ୍ଦର କରିବା ପାଇଁ ।
ବାହ୍ୟ ଆବରଣୁ କି ମିଳିବ ମୋତେ
ମନ ସୁନ୍ଦର ନଥିଲେ,
ତାହାକୁ ନିଶ୍ଚୟ କରିବି ସୁନ୍ଦର
ଥିଲା ଯାଏଁ ମହୀ ତଳେ ।
ତୁମ ବିନା ପ୍ରଭୁ ସବୁ ତ ଅସାର
ତୁମ ବିନା କେହି ନାହିଁ,
ଖରା-ଛାଇ ଏଇ ଚଲାବାଟରେ
ଚାଲୁଛି ତୁମରି ପାଇଁ ।
ତୁମ ଶ୍ରୀପଦରେ ସମର୍ପଣ କଲି
ମୋର ପୂରା ଜୀବନକୁ,
ସମସ୍ତଙ୍କୁ ସ୍ନେହ ଦୃଷ୍ଟିରେ ଦେଖିବି
କଥା ଦେଉଛି ତୁମକୁ ।
ଯାହା ହେବ ସବୁ ମୋର କର୍ମଫଳ
କହିବାର କିଛି ନାହିଁ,
ଯେଉଁଠି ରଖିବ ଯେମିତି ରଖିବ
ରହିବି ସେମିତି ହୋଇ ।
ମାଗିବିନି କିଛି ନିଜ ପାଇଁ କେବେ
କରିବିନି ଅଭିଯୋଗ,
କରିଛି ଯେତିକି ଜୀବନରେ ମୁହିଁ
ଦଣ୍ଡନୀୟ ଅପରାଧ ।
କ୍ଷମା ମାଗିବି ନା ଦଣ୍ଡ ମୁଁ ମାଗିବି
କିଛି ବୁଝି ପାରୁନାହିଁ,
ସବୁ ତୁମ ଇଚ୍ଛା ଆହେ ମୋର ପିତା
ସବୁ ତୁମ ଦୟା ପାଇଁ ।
କରୁଛି ମିନତୀ ହେ ଜଗତପତି
ତୁମରି ଶ୍ରୀପାଦ ତଳେ,
ତୁମ ପାଇଁ ପ୍ରଭୁ ମୋ ହୃଦ-ମନ୍ଦିରେ
ପ୍ରତ୍ୟହ ପ୍ରଦୀପ ଜଳେ ।