ଶୁଖିଲା ଶ୍ରାବଣ
ଶୁଖିଲା ଶ୍ରାବଣ
ଶୋଇ ଯାଇ ଅଛି
ବରୁଣ ଦେବତା
ରୁକ୍ଷ କୁମ୍ଭକର୍ଣ୍ଣ ସାଜି ।
ଧରା ଭୂମି ପରେ
ନାହିଁ ଧାରା ପାତ
ଶୁଖିଲା ଶ୍ରାବଣ ଆଜି ।
ଫାଟି ପଡ଼ୁଥିଲା
ଦିନେ ଛବିଳାର
ଛବିଳ ରୁପର ଛଟା ।
ନାହିଁ ତ ଜଳଦ
ଆଜି ଏ ଶ୍ରାବଣେ
ସେ ମହା ରୁପର ଘଟା ।
କ୍ଲାନ୍ତ ନୟନେ
କୃଷକ ଆତୁରେ
ଚାହୁଁଛିରେ ବାରବାର ।
ଶୁଖିଲା ଶ୍ରାବଣ
ଆଣିଛି ବିଷାଦ
ଦୁଃଖରେ ହୁଏ ଅଧୀର ।
ତୋ କୃପା ଉପରେ
ରଖିଥିଲା ସେହୁ
ସକଳ ଭରସା ତାର ।
ଆଜି ଭାବୁନାହିଁ
ଖେଳାଇବୁନି ତୁ
କରୁଣାର ପାରାବାର ।
ମମତା ଧାରା ତୋ
ଝରୁନି ଶ୍ରବଣେ
ନବୀନ ଶସ୍ୟ ଶିରେ ।
କ୍ଷେତ ଉଛୁଳୁନି
କ୍ଷିତି ଭରୁନାହିଁ
ଗଗନୁ ବହୁନି ନୀରେ ।
ଆଶାର ସଉଧ
ଭାଜି ଯାଉ ଅଛି
ତିଳ ତିଳ ହୋଇ ହାୟ ।
ଦୟା ର ଦେବତା
ଛାତି ତୋ ପାଶାଣ
ଶ୍ରାବଣେ ହେଉ ତୁ ନିର୍ଦୟ ।
ଶୁଖିଲା ଶ୍ରାବଣ
ଖୋଜୁଛି ରେ ଆଜି
ଢାଳିଦେ ବୃଷ୍ଟି ଅଚିରେ ।
ଫେରି ଆସୁ ଚାଷୀ
ମୁଖେ ସରସତା
ଏଇ ମର୍ତ୍ତ୍ୟ ଧାତିକାରେ ।