ଶେଷ ଠିକଣା
ଶେଷ ଠିକଣା
ଠିକଣା କେତେ ମୋ ବଦଳିଛି ସଦା
ଅନ୍ତ ମୁଁ ପାଉନି ତାର ।
କାଲିର ଠିକଣା ଆଜି ଆଉ ନାହିଁ
ଆଜି ଠିକଣା ଆଜିର ।
ପୁରୁଣା ଠିକଣା ଜଣାନାହିଁ ମୋତେ
କାହିଁ କେଉଁଠାରେ ଥିଲି ।
ମାତୃ ଗରଭରୁ ଦିନେ ଆସି ମୁହିଁ
ଧରାରେ ଜନମ ନେଲି ।
ଯହିଁ ଜନମିଲି ଠିକଣା ମୋହର
ସେଇଠି ରହିଲା ଯାଇ ।
କ୍ରମେ ବଡ ହେଲି ଠିକଣା ମୋହର
ସେଇଠି ରହିଲା ନାହିଁ ।
ପାଠ ମୁଁ ପଢିଲି ସହରକୁ ଗଲି
ଠିକଣା ଗଲା ବଦଳି।
କିଛି ଦିନ ପରେ ଚାକିରୀ କରିଲି
ଆହୁରି ଗଲା ବଦଳି ।
ବଦଳି ହୋଇଲା ଗୋଟିଏ ଜାଗାରୁ
ନୂଆ ଠିକଣା ହୋଇଲା ।
ଚାକିରୀ ବଦଳି ଠିକଣା ମୋହର
କେତେ ଥର ବଦଳିଲା ।
ସରିଲା ଚାକିରୀ ଅବସର ନେଲି
ଠିକଣା ବଦଳି ଗଲା ।
କେତେ କେତେ ମୋର ଠିକଣା
ବଦଳି କିଛି ମନେ ନ ରହିଲା ।
ବୁଲି ଗଲି ଯେବେ ଏଣିକି ତେଣିକି
ବଦଳି ଗଲା ଠିକଣା ।
ଏତିକି ଠିକଣା ବଦଳିଲା ମୋର
ମିଳିନି ଶେଷ ଠିକଣା ।
ବୁଲି ବୁଲି ଶେଷେ ଜୀବନ ସରିଲା
ମିଳିଲା ଶେଷ ଠିକଣା ।
ସ୍ୱର୍ଗଦ୍ୱାର ହେଲା ଶେଷ ଠିକଣା ମୋ
ହେବି ନାହିଁ ଆଉ ବଣା ।