କରୁଅଛି ନିବେଦନ

କରଯୋଡ଼ି ତୁମ ଚରଣ ତଳରେ

କରୁଅଛି ନିବେଦନ 

ଭାଇଙ୍କୁ ମୋହର ସର୍ବ ସଙ୍କଟରୁ

ରଖିଥାଅ ଭଗବାନ ।

ତୁମେ ଯେଉଁଭଳି ଲୀଳା କରୁଅଛ

ଭ୍ରାତା ଭଗ୍ନୀ ସାଥେ ଧରି 

ମୋତେ ଦେଇଅଛ ଦୁଇଗୋଟି ଭାଇ

ଅବିକଳ ସେହିପରି ।

ଜଗତ ରହିଛି ତୁମ ସୁମଧୁର

ସମ୍ପର୍କର ପରା ସାକ୍ଷୀ 

ଶ୍ରାବଣ ପୂର୍ଣ୍ଣମୀ ତିଥିରେ ସୁଭଦ୍ରା

ତୁମଙ୍କୁ ବାନ୍ଧନ୍ତି ରାକ୍ଷୀ ।

ସ୍ନେହ ମମତାର ଡୋରଟିଏ ଆହା

ଦୁନିଆ ବୁଝି ତା' ମୂଲ୍ୟ 

ପାଳନ କରୁଛି ଅତି ଆଗ୍ରହରେ

ତୁମେ ଯା' ଶିଖାଇ ଦେଲ ।

ଭଉଣୀ ମନାସେ ଭାଇଙ୍କର ଶୁଭ

ରକ୍ଷା ସୂତ୍ର ବାନ୍ଧି ହାତେ 

ଭାଇ ବି ତାହାକୁ ବିପଦେ ଆପଦେ

ସାହାହୁଏ ସାଧ୍ୟ ମତେ ।

ମୁଁ ଏଠି ତୁମକୁ ରାକ୍ଷୀ ପିନ୍ଧାଇକି

ଭାଇଙ୍କ କୁଶଳ ଇଚ୍ଛେ 

ଜାଣେ କୃପାକରି ସଙ୍କଟ ନିବାରି

ସାହା ହେବ ପ୍ରଭୋ ନିଶ୍ଚେ ।