ନୂଆ ବର୍ଷର ଅନୁଭୂତି
ନୂଆ ବର୍ଷର ଅନୁଭୂତି
ସରିଗଲା ଦିନ ରହିଗଲା ତାର
ପୁଳା ପୁଳା ସ୍ମୃତି ଚିହ୍ନ
କ୍ୟାଲେଣ୍ଡର ଖାଲି ରୂପ ବଦଳାଇ
ଦେଖାଏ ନୂଆ ସପନ |
ପୁରୁଣା ବରଷ ପୁରୁଣା ହୋଇଣ
ରହିଯାଏ ଅଧାବାଟେ
ନୂତନ ବରଷ ହାତରେ ସମର୍ପି
ଚାଲିଯାଏ ନିଜ ବାଟେ |
ନୂତନ ବରଷ ମଧ୍ୟରାତ୍ରେ ଆସି
ଗାଲକୁ ଦେଇ ଆଉଁସି
ନୂତନ ଆଶାର ସଂଚାର କରଇ
ସପନେ ଗୋପନେ ଆସି |
ଦିନ ପରେ ଦିନ ବଦଳେ ଏଠାରେ
କାଳଚକ୍ରର ଏ ଗତି
ପୃଥିବୀ ପୃଷ୍ଠରେ କିଛି ବଦଳେନି
ବଦଳେ ମଣିଷ ମତି |
ସ୍ବାର୍ଥର ପଛରେ ଅନୁଧାବନର
ହୁଏ ନାହିଁ ଜମା ଶେଷ
ସ୍ବାର୍ଥ କା'ର ଏଠି ପୂରଣ ହୁଅଇ
କା'ର ରହେ ଅବଶୋଷ |
ନିଜ ସ୍ବାର୍ଥ ଲାଗି ମଣିଷ ଏଠାରେ
କାଟଇ ପରର ତଣ୍ଟି
ଭଲପାଇବାର ଛଳନା କରିଣ
ଅଣ୍ଟି ଛୂରୀ କାଟେ ତଣ୍ଟି |
ସହର ସହର କେତେ ଯେ ସହର
ଆସେ ମୋର ଚଲାପଥେ
ଚିହ୍ନା ମୁହଁ ସବୁ ଅଚିହ୍ନା ଲାଗଇ
ଜାଣି ପାରେନି କେମନ୍ତେ ।
କେତେ ନୂଆ ନୂଆ ଲୋକର ସାଥିରେ
ଦେଖା ହୁଏ ପ୍ରତିଦିନ
ନୂଆ ବନ୍ଧୁ ଦିନେ ପୁରୁଣା ହୁଅଇ
ବଦଳଇ ତାର ମନ |
ଆଜି ଯିଏ ନିଜ କାଲି ହୁଏ ପର
ସବୁ ଖେଳ ସମୟର
ଦିନ ସରିଗଲେ ରାତ୍ରୀ ଆଗମନ
ରାତ୍ରୀ ପରେ ପ୍ରଭାତର |
ପ୍ରକୃତି ଯେମିତି ବଦଳଇ ନିତି
ବଦଲଇ ରାତିଦିନ
ସମୟ ସାଥିରେ ମଣିଷ ବଦଳେ
ବଦଳେ ତାହାର ମନ |
ଦିନରେ ଆକାଶେ ଉଅଁଇ ସୂରୁଯ
ରାତିରେ ଉଅଁଇ ଜହ୍ନ
କେତେ କେତେ ନୂଆ ଘଟଣା ମନରେ
ଛାଡିଯାଏ ସ୍ମୃତିଚିହ୍ନ |
ସୁଖ ପରେ ଦୁଃଖ ଆସଇ ଜୀବନେ
ଦୁଃଖ ପରେ ଫେରେ ସୁଖ
ନୂଆ ବରଷରେ ମହାମାରୀ ଦୁଃଖ
ଆଣିବ କି ସତେ ସୁଖ !
ମନରେ ପୁଲକ ଆଣି ଆସିଥିଲା
ମଧ୍ୟ ରାତ୍ରେ ନୂଆ ବର୍ଷ
ସପନ ଦେଖାଇ ଭରିଦେଇଥିଲା
ମନରେ ଅପୂର୍ବ ହର୍ଷ |
ସପନ ମୋହର ସପନେ ରହିଲା
ସତଟା କହୁଛି ଶୁଣ
ମାୟା ମରିଚିକା ପଛେ ଧାଇଁ ଶେଷେ
ଅବଶେଷ ହେଲା ଶୂନ |
ନିଜ ଲୋକମାନେ ପର କରିଗଲେ
ଚିହ୍ନା ହୋଇଲା ଅଚିହ୍ନା
ସଂସାର ହାଟରେ ସଉଦା କରିବା
କଷଣ କଉଡି ବିନା |