ନୂଆ ବରଷ ନୂଆ ଶପଥ
ନୂଆ ବରଷ ନୂଆ ଶପଥ
ଆସିଛି ଆଜିରେ ନୂଆ ବରଷ
ଅଜାଡି ଦେଉଛି ନୂଆ ପରଶ
ପୁରୁଣା ଗଲାଣି ହଜି,
ବଣ ବିଲ ନଈ ପାହାଡ ଭୂଇଁ
ନାନା ଜାତି ରଙ୍ଗେ ରଙ୍ଗେଇ ହୋଇ
ଖୁସିରେ ଗଲେଣି ମଜି ।
ନୂଆ ସକାଳର ନୂଆ ସୂରୁଜ
ବୁଣି ତ ଦେଲେଣି ନୂଆ ମୁରୁଜ
ହସିଲେଣି ଫୁଲ ଫଳ,
ଆକାଶରେ କେତେ ଟିକି ଚଢେଇ
ଉଡିଲେଣି ଟିକି ଡେଣା ମେଲାଇ
ଆସିଲାଣି ଶୁଭ ବେଳ ।
ଗୀତରେ ନାଚରେ ହଜିଛି ମନ
ଆଖିରେ ଭରିଛି ନୂଆ ସପନ
ଅନ୍ଧାର ଗଲାଣି ହଟି,
ସକାଳ ନୂଆକୁ ସପନ ନୂଆ
କରିବ ଆମକୁ କେତେ କିମିଆଁ
ଚେଇଁ ଉଠିବ ଏ ମାଟି ।
ନୂଆ ବରଷରେ ନୂଆ ଯୋଜନା
ଛୁଇଁବ ମନକୁ କେତେ ଭାବନା
ସତ୍ୟର ଜଳିବ ବତି,
ହିଂସା କପଟକୁ ଦୂରେଇ ଦେବା
ଶାନ୍ତିର ବାରତା ଆମେ ବାଣ୍ଟିବା
ଅହିଂସା ଆମର ନୀତି ।
ନୂଆ ବରଷର ନୂଆ ଶପଥ
ଛାଡିବା ଆମେରେ ଯେତେ କୁପଥ
କହିବାନି ଆମେ ମିଛ,
ଆଜିର କାମକୁ ଏବେ କରିବା
କାଲିର କାମକୁ ଆଜି କରିବା
ରଖିବା ନିଜକୁ ସ୍ବଚ୍ଛ ।