ନୂଆ ଆମ ନୂଆଖାଇ

ଶୁଣରେ ପିଲାଏ     ତୁମ ଭିତରୁ କେ

ପାରିବ କି ମୋତେ କହି

କେଡ଼େ ଖୁସି ଲାଗେ   ମିଳିଲେ ତୁମକୁ

ନୂଆ ଖାତା ଆଉ ବହି ?

ନୂଆ ଖେଳନା କି     ନୂଆ କଲମଟେ

ପାଇଲେ ଲାଗଇ ଖୁସି

ନୂଆ ଜିନିଷରେ     ମଇଳା ଲାଗିଲେ

ଯାଅନା କି ତୁମେ ରୁଷି ?

ନୂଆ ନୂଆ ଫଳ      ପାଟିକୁ ସୁଆଦ

ଖାଇଲେ ଲାଗେ କି ମଜା

ଭଲ ଲାଗେ ବୋଲି   ନୂଆରେ କିଭଳି

ଖୁସିରେ ପେଁକାଳି ବଜା ।

ନୂଆ ସାଇକେଲ    ନିତି ପୋଛିପାଛି

ଖୁସିରେ ତ ସଫା କଲ

କିଣା ହୋଇଥିଲେ    ନୂଆ ଜାମାଟିଏ

ପିନ୍ଧିବାକୁ ଲାଗେ ଭଲ ।

ନୂଆ ଜାଗା ଏକ    ବୁଲି ଆସି ଦେଖ

ପ୍ରଫୁଲ୍ଲ ଲାଗଇ ମନ

ନୂଆ ନୂଆ ଦୃଶ୍ୟ     ନୂଆ ପରିବେଶ

ପାସୋରେ କି କେଉଁ ଜନ ?

ନୂଆ ସାଙ୍ଗ ସାଥେ  ଭେଟ ହେଉ ହେଉ

ଅଶେଷ ଆନନ୍ଦ ମିଳେ

ହେଲେ ସବୁ ନୂଆ    ପୁରୁଣା ବି ହୁଏ

ସନ୍ଦେହ ନାହିଁ ତ ତିଳେ ।

ସମୟ ସାଥିରେ       ନୂତନ ଦରବ

କି ଅବା ନୂତନ ଭାବ

ନିଶ୍ଚୟ ତ ଦିନେ     ପୁରାତନ ହେବ

ଦୁଃଖ କରି କେଉଁ ଲାଭ ?

ତଥାପି ତ ଦେଖ     ନୂଆଖାଇ ଆଜି

ସବୁକିଛି ନୂଆ ନୂଆ

ନୂଆ ସାଜସଜ୍ଜା     ନୂଆ ଲୁଗାପଟା

ବଡ଼ ହୁଅନ୍ତୁ ବା ଛୁଆ ।

ନୂଆ ଧାନ ଆଣି    ଖିରି ପୁରି ସାଥେ

ପୂଜା ହୁଏ ଘରେ ଘରେ

ଭେଟଘାଟ ହେଲେ    ଜୁହାର କରିବା

ଗୁରୁଜନେ ଭକ୍ତି ଭରେ ।

ମାଆ ସମଲେଇ   ଆଶୀର୍ବାଦ ନେଇ

ଆରମ୍ଭ କରିବା କାମ

ନୂଆଖାଇ କେବେ    ପୁରୁଣା ନୁହଁଇ

ରଖିବା ଜଗତେ ନାମ ।