ନମସ୍ତେ ମା' ଶୈଳପୁତ୍ରୀ
ନମସ୍ତେ ମା' ଶୈଳପୁତ୍ରୀ
ନମସ୍ତେ ମା' ଶୈଳପୁତ୍ରୀ ହିମବନ୍ତ ଜେମା
ବାଞ୍ଛା ଫଳ ପ୍ରଦାୟିନୀ ତ୍ରି ନେତ୍ର ଚନ୍ଦ୍ରମା l
ବୃଷଭ ବାହନୀ ମା'ଲୋ ତ୍ରିଶୂଳ ଧାରିଣୀ
କରୁଣାମୟୀ ମାଆ ତୁ ଜୟ ନାରାୟଣୀ l
ନାନାଳଙ୍କାର ଭୂଷିତେ ମସ୍ତକେ କିରୀଟ
ସିନ୍ଦୁରର ବିନ୍ଦୁ ଶୋଭେ ଉନ୍ନତ ଲଲାଟ l
ପିତାମ୍ବରୀ କାନ୍ତେ ଶାନ୍ତେ ପ୍ରଫୁଲ୍ଲଵଦନୀ
ତ୍ରିପୁରେ ପୂଜିତା ମାତା ଦ୍ୱିଭୁଜା ଶିବାନୀ l
ଏକ ହସ୍ତେ ଶୂଳ ଆନହସ୍ତେ ତୋ କମଳ
ବୃଷଭେ ଆରୋହୀ ଭ୍ରମୁ ଭୁବନ ମଣ୍ଡଳ l
ବହୁ କାଳ ତପ ଫଳେ ହିମାଳୟ ମେନା
ପୁତ୍ରୀରୂପେ ଲଭିଥିଲେ ମାତ ତୁ ଅପର୍ଣ୍ଣା l
ସତୀ ବିସର୍ଜନେ ଶିବ ଶବ ପ୍ରାୟ ହୋଇ
ତପକରି କାଳେ ଲଭିଥିଲେ ମହାମାୟୀ l
ଉଦରୁ ସମ୍ଭବି ତୋର ଦେବ ସେନାପତି
ତାରକାସୁର ବଧିଲେ ଦେବକାର୍ୟେ ମତି l
ଉମା,ଗୋଉରୀ,ଚଣ୍ଡିକେ ତୁହି ଜଗଦମ୍ବେ
ଆନନ୍ଦମୟୀ ମାଆ ତୁ ଜଗଦ୍ଧାତ୍ରୀ,ଅମ୍ବେ l
ତୋ ପାଦେ ନମଇଁ ମାତେ ଅଜ୍ଞାନ ଅଧମ
ନମସ୍ତସୈ,ନମସ୍ତସୈ ମହାଦେବୀ ନମଃ l