ନକଲି ଦୁନିଆଁ

ନକଲି ନକଲି ସବୁ ତ ନକଲି

    ଏ ଦୁନିଆଟା ଦେଖ ନକଲି

ଯାହାକୁ ବା ଦେଖ ଯେମିତି ବା ଦେଖ 

   କେବେବି ନୁହେଁ ସେ ଅସଲି ।

ଅସଲି ଜିନିଷ ମିଳିବାଟା କଷ୍ଟ 

    ନକଲି ରହିଛି ବହୁତ

ଖୋଲି କହିଦେଲେ ରହିବନି ଚୁଟି

    ରହିବନି ଭାଇ ଇଜତ ।

ଜନ୍ମ ଠାରୁ ମୃତ୍ୟୁ ଟିକେ ଲକ୍ଷ୍ୟ କର 

    ଅସଲି ରହିଛି କେତେ 

ନକଲି ରାଜୁତି କରୁଛି ବହୁତ 

    ଏଇତ ମିଛ ଜଗତେ ।

ଏ ମିଛ ଜଗତ ଏଇତ ମାନବ 

    ନିଜ ସ୍ବାର୍ଥେ ତୋଳି ଅଛି

ନିଜେ ତ ନକଲ କରୁଛି ନକଲି

    ସଭିଁଙ୍କି ଭଣ୍ଡାଉ ଅଛି ।

ଭଣ୍ଡ ଠକାମୀରେ ଚାଲିଛି ଦୁନିଆ 

     ନକଲ କରୁଛି ସବୁ

ସେଇ ନକଲକୁ ନକଲି କରି ସେ

    ଅସଲି କହେ ସଭିଁଙ୍କୁ ।

ଜନ୍ମିତ ଶିଶୁକୁ ପରୀକ୍ଷାତ କର 

    କେତେ ସେ ଅଛି ଅସଲି

ଇଞ୍ଜେକସନ କିମ୍ବା ଔଷଧ ବଳରେ 

     ହୁଏ ବି ସିଏ ନକଲି ।

ଚାଲିବା, ଖାଇବା, କହିବା, ଶୋଇବା

     ପଢିବା, ଗାଇବା ଆଦି 

ନାଚିବା, ଲେଖିବା, ଭାଷଣ ମାରିବା 

    ପିନ୍ଧିବା ବସ୍ତ୍ର ଇତ୍ୟାଦି ।

ସେଥିରେ କେତେ ଯେ ଅସଲି ରହିଛି

     ନକଲି ରହିଛି କେତେ

ଶାସନକୁ ଦେଖ ଶାସକଙ୍କୁ ଦେଖ

    ଜାଣି ଯିବ ଆପେ ସତେ ।

ଖାଇବା ଜିନିଷ ବ୍ୟବହାର ଆଦି

     ସବୁତ ଭେଜାଲ ମିଶା

ନକଲି ଜିନିଷ ଅସଲି କହି କି

     ନର ହୁଏ ଲୋକହସା ।

ଚାଉଳ ବା ଧାନ ଦେଖ ଅବା ଅଟା

    ପନିପରିବା ତେଲ ଲୁଣ

ଅସଲି ଭିତରେ ସବୁ ତ ନକଲି

    ଖୋଜି ପାଇବନି ଖୁଣ ।

ନକଲି ଖାଇକି ନକଲ କରି କି

    ନକଲି ସାଜିଛି ଆଜି

ନିଜେ ତ ହାରିଛି ରୋଗିଣା ସାଜିଛି

    ଜୀବନ ପଡିଛି ବାଜି ।

ସୁନା, ରୂପା, ଅଳଙ୍କାର ଯାହା କିଣ

    ନକଲି ରହିଛି ବେଶୀ

ଆମକୁ ଫସେଇ ଏଇ ଆମ ନେତା 

    ସହଜେ ଯାଆନ୍ତି ଖସି ।

ଚୋରା କାରବାର ହେଉଥାଏ ବେଶୀ

     ନକଲିରେ ଭରପୁର

ଇନ୍ଦିରା ଆବାସ ରୋଡ କାମ ଦେଖ

     ଅସଲିଟା ପୂରା ଜିରୋ ।

ଏଇ ଜିରୋ ଶବ୍ଦ ନୁହେଁ ମାତୃଭାଷା 

     ଭାଷାରେ ନକଲି ବେଶୀ

ନକଲି ସଜେଇ ଇଂରେଜ ଆମଙ୍କୁ

     ସହଜେ ଯାଇଛି ଖସି ।

ବିଦେଶୀ ହଟିଲା ସ୍ୱାଧୀନ ହୋଇଲା

    ଅସଲି ଗଲାତ ହଜି

ଏମିତି ନକଲି ବୀଜ ବୁଣି ଦେଲା

   କଥାରେ କହନ୍ତି ବିଜି ।

ଓଡିଆ ଭାଷାରେ ଇଂରେଜ ଶବ୍ଦକୁ

     କଥାରେ କହୁଛେ ସବୁ

ମାତୃଭାଷା ଆମ ଗର୍ବ ଓ ଗୌରବ 

     ନକଲି କରୁଛେ ତାକୁ ।

ଭାଷା ବି ନକଲି ପୋଷାକ ନକଲି 

    ବାସ ବି ନକଲି ଆମ

ନକଲି ସାଜିକି ଦେଖେଇ ହେଉଛେ

    କରୁଅଛୁ ବଡ କାମ ।

ଟଙ୍କାରେ ଟଙ୍କାରେ ସବୁ କିଣା ବିକା

       ଅସଲି ଜାଣୁଛି କିଏ

ଅସଲି ନକଲି ଫରକ ପଡୁନି

        ଟଙ୍କାରେ ପାଗଳ ହୁଏ ।

ନକଲି ସାଜୁଛି କନିଆଁ ବେଦୀରେ

     ଟଙ୍କାରେ ଚାଲେ ଦୁର୍ନୀତି 

ସାଧୁ ଠାରୁ ଚୋର ଧର୍ମ ଠାରୁ ପାପ

    ନକଲି ହୁଏନା ଇତି ।

ବିଶ୍ଵାସ ଭରସା ସବୁତ ହଜିଛି 

     ନକଲି ପାଉଁଶ ନିଆଁ 

ମିଛ ଦୁନିଆରେ ସବୁ ତ ନକଲି 

    ନକଲି ଅଟେ ଦୁନିଆ ।