ନିଜକୁ ପାଏନି ଖୋଜି

ସମୟ ସ୍ରୋତରେ ଲିଭିଯାଏ ଏଠି 

       ଜୀବନର କେତେ ଗାଥା 

ସ୍ମୃତି କେବେ କେବେ ଭାବନା ଖିଅରେ 

       କହେ ତା' ଅନ୍ତର କଥା ll

ଅଫେରା ବାଟରେ ଜୀବନ ହାଟରେ 

       ଅତୀତ ତ ଯାଏ ଚାଲି 

ନିଜେ ପୁଣି ଏଠି ନିଜକୁ ଖୋଜିଲେ 

      ଶୂନ୍ୟତା ବିରାଜେ ଖାଲି ll

ବେଳେବେଳେ ଏଠି ଜୀବନଟା ପୁଣି 

       ବଖାଣେ ମରମ କଥା 

ନିଃଶବ୍ଦ ନିଥର ଅବ୍ୟକ୍ତ ସେ ସ୍ୱର 

       ଅସରନ୍ତି ମନ ବ୍ୟଥା ll

ନିଜ ଦୁଃଖ ସବୁ ନିଜ ପାଇଁ ଏଠି 

       ଅନ୍ୟକୁ ହୁଏନି କହି 

ମନର ବେଦନା ନକହି ପାରିଲେ 

      ଦେହ ତ ପାରେନି ସହି ll

ବେଦନାର ଭାର ହୋଇଯାଏ ଦୂର 

       ନିଗିଡି ପଡିଲେ ଲୁହ 

ଏଇ ଲୁହ ହୁଏ ବଞ୍ଚିବାର ରାହା 

      ଛାଡି କେ ପାରିଛି କୁହ? ll

ଜୀବନ ରାସ୍ତାରେ ଏକା ହୋଇଗଲେ 

       ଲୁହ ତ ଜୀବନ ସାଥୀ 

ନିଃସଙ୍ଗ ନୀରବେ ବିତିଯାଏ ପୁଣି 

     କେତେ ଦିନ କେତେ ରାତି ll

ତଥାପି ଚାଲିଛି ଜୀବନଟା ଏଠି 

      ସ୍ୱପ୍ନ-ପ୍ରତୀକ୍ଷାରେ ହଜି 

ବେଳେ ବେଳେ ଏଠି ବାଟ ଭୁଲିଯାଏ 

       ନିଜକୁ ପାଏନି ଖୋଜି ll