ନିଜେ ମୁଁ ବୁଝି ପାରିଲି

ସିଧାକଥା-୨୭

ମାଆ କହିଲେ-ପିଲାଟିବେଳେ ପାଇବୁ ଯଦି ହରି,

ବିପଦବେଳେ ତାଙ୍କରି ନାମ ଧରିବୁ ପାଟିକରି ।

ପୁରୋହିତଟି କହିଲେ-ବାବୁ ପୂଜାରେ ଦେବୁ ମନ,

ବ୍ରାହ୍ମଣ-ଦୁଃଖୀ ଗରିବ ଦେଖି କରିବୁ ନିତି ଦାନ ।

ଶିକ୍ଷକ ମୋର କହିଲେ-ଶୁଣ ପାଠରେ ଦେବୁ ଧ୍ୟାନ ।

ସବୁ ଦେବତା ମିଳିବେ ବଳେ ପାଖରେ ଥିଲେ ଜ୍ଞାନ ।

ବଡ଼ ହେବାରୁ ବୁଝିଲି ପୁଣି ସବୁଠୁଁ ବଡ଼ ଧନ,

ଧନ ବଳରେ କିଣିବି ମୂର୍ତ୍ତି ଆସିବେ ଭଗବାନ ।

ବାବାଜୀ ଜଣେ କହିଲେ-ମୋତେ କରିବୁ ଯଦି ଗୁରୁ,

ନେଇଯିବି ମୁଁ ଈଶ୍ଵର ପାଶେ ଯଦି ବିଶ୍ୱାସ କରୁ ।

ପଢିଲି ବାଛି ଶାସ୍ତ୍ରରେ ଲେଖା ମନ୍ଦିର ମୋର ଦେହ,

ତହିଁରେ ହରି ବିରାଜିଛନ୍ତି ଦେଖାନ୍ତି ନାହିଁ ମୁହଁ ।

ବିବେକ ରୂପେ ଆଦେଶ ଦିଏ ମୋ ଆତ୍ମା ନାରାୟଣ,

ମନ ତା' ଦାସ ଅମାନିଆଟା କରୁଛି ହଇରାଣ ।

ଆପଣା ଦୋଷେ ମରିଲେ ପ୍ରାଣୀ ଦିଏ ହରିଙ୍କ ଦୋଷ,

ମୋ ପାଶେ ପାଣି ଅଛି ନ ଜାଣି ଲାଗୁଛି ମୋତେ ଶୋଷ ।