ନୀରବ ସଂପର୍କ

ମନ  ଉପବନେ 

ଥିଲ ଏକା ତୁମେ 

     ମୋ ମନ ମଧୁର ବାସ,

ଅଦିନେ ଝରିଲ

ବୃନ୍ତ ଚ୍ୟୁତ କଲ

     ପାଏନି ତୁମ ପରଶ ।

ଖୋଜେ ଉପବନ 

ମକ୍ଷିକା ମୋ ମନ

     ତୁମ ଓଷ୍ଠ ମିଠା ମଧୁ ,

ଖୋଜେ  ପରିବେଶ

ଖୋଜେ ମୋ ନିଶ୍ବାସ

     ତାଜା ତାଜା ବାସ ସିନ୍ଧୁ ।

ତୁମେ ହଜିଗଲ

ଗଲ  ବହୁଦୂର 

     ସ୍ମୃତି ମୋ ମନରେ ଲେଖା ,

ଡେଇଁ ନାହିଁ ମୁହିଁ

ଡେଇଁ ମୁଁ ପାରୁନି 

     ତୁମରି  ଲକ୍ଷ୍ମଣ  ରେଖା ।

ନୀରବେ ଦେଖୁଛି 

ନୀରବେ  ସହୁଛି 

     ଆନ୍ଦୋଳିତ ଅନ୍ତରାତ୍ମା ,

ତେବେବି ଭୁଲିନି

ଭୁଲି ମୁଁ  ପାରୁନି 

      ନିତି ଲଭେ ତୁମ ସତ୍ତା ।

ମୋ ମନ ସପନ 

ରାଜ୍ୟେ ତୁମ ମନ

     ପକ୍ଷୀରାଜ ଘୋଡ଼ା ଚଢ଼ି ,

ନିତି  ବୁଲି ଆସେ 

ମୋ ମନ ନିରାଶେ

      ନୀରବ ସଂପର୍କ ଯୋଡ଼ି ।

ନୀରବର  ସତ୍ତା 

ଜୀବନେ ସାଇତା 

      ନାହିଁ କେହି ପ୍ରତିବାଦୀ,

ଆତ୍ମାର ପ୍ରଣୟ 

ରଚେ ସୁଧାମୟ 

       ଆତ୍ମାରେ ଆତ୍ମାକୁ ଛନ୍ଦି ।

ଥାଅ ଦୂରେ  ଯେତେ 

ମନ ଖୋଜେ ସେତେ 

      ନିରବତା କରି ସାଥୀ ,

ହଜାଇଲା  ଚକ୍ଷୁ 

ଯାଇନ ମୋ ବକ୍ଷୁ 

      ତୁମେ ମୋ ମନ ସାରଥୀ ।

ନୀରବ ସମ୍ପର୍କେ

ବନ୍ଧା ଦୁଇ ପ୍ରାଣ 

     ଖୋଜନ୍ତି ଦୁହେଁ ଦୁହିଁଙ୍କୁ ,

ତୁଟିବନି କେବେ 

ଏ ପ୍ରେମତ ଏବେ

      ଅମର କାଳ କାଳକୁ ।