Library
Profile
ନୀଳାଦ୍ରି ବିହାରୀ ହେ
ନୀଳାଦ୍ରି ବିହାରୀ ହେ
ବନ୍ଧୁ ମହାନ୍ତି ର ବନ୍ଧୁ ଶ୍ରୀ ନୀଳାଚଳ ରେ
ଦାସିଆ ନଡ଼ିଆ ଲୋଭି କଳ୍ପବଟ ମୂଳେ
ବସିଛନ୍ତି ଚକା ଆଖି
ଲକ୍ଷେ ଶାଳଗ୍ରାମ ସ୍ଥିତ ଚକା ବଇଠି ରେ
ବନ୍ଧୁ ମହାନ୍ତି ର ବନ୍ଧୁ ଶ୍ରୀ ନୀଳାଚଳ ରେ
ବଳରାମ ଦାସ ବାଲି ରଥର ରସିଆ
ସାଲବେଗ ଯବନ ର ଆରତ ଦଳିଆ
ଅବିରତ ଅପଲକେ
ରମଣୀୟ ହସ ତାଙ୍କ ନାଲି ଓଠ ଧାରେ
ବନ୍ଧୁ ମହାନ୍ତି ର ବନ୍ଧୁ ଶ୍ରୀ ନୀଳାଚଳ ରେ
ଶ୍ରୀ ଜୟଦେବ ରଚନା ଶ୍ରୀ ଗୀତଗୋବିନ୍ଦ
ସଙ୍ଗେ ରସେ ଦେବଦାସୀ ଲାସ୍ୟ ନୃତ୍ୟ ଛନ୍ଦ
ରମା ରମଣ ସୁନ୍ଦର
ନୀଳାମ୍ବର,ସୁଭଦ୍ରିକା ଭଗିନୀ ସଙ୍ଗରେ
ବନ୍ଧୁ ମହାନ୍ତି ର ବନ୍ଧୁ ଶ୍ରୀ ନୀଳାଚଳ ରେ
ନିମାଇଁ ହରିଚନ୍ଦନ ଗୀତରେ ବିମୁଗ୍ଧ
ଢଳି ଢଳି ପହଣ୍ଡି ରେ ମୋର କଳାଚାନ୍ଦ
ନନ୍ଦିଘୋଷ ରଥ ରଥି
ବଡ଼ଦାଣ୍ଡେ ବିହରନ୍ତି ମହା ସମାଦରେ
ବନ୍ଧୁ ମହାନ୍ତି ର ବନ୍ଧୁ ଶ୍ରୀ ନୀଳାଚଳ ରେ
ଶ୍ରୀ ଚୈତନ୍ୟ ଚିତ୍ତ ଚୋର ଠାକୁର “ଜଗତ-
ନାଥ” ତେଣୁ ନାମ ବସିଛନ୍ତି ଜଗନ୍ନାଥ
ଦୁଷ୍ଟ ଦଳି ସନ୍ଥ ପାଳେ
ଦୁଃଖୀ ର ସଙ୍ଗାତ ଦୁଃଖୀ ଦୁଃଖ ବୁଝିପାରେ
ବନ୍ଧୁ ମହାନ୍ତି ର ବନ୍ଧୁ ଶ୍ରୀ ନୀଳାଚଳ ରେ
ଏମନ୍ତ ସେ କଳା ଐରାବତ ମହାବାହୁ
ସେ ନାମ ଜପିଲେ କାଳ ନଛୁଅଁଇ ଆଉ
ମୋଖ୍ୟ ଲଭେ ମହାପାପି
ଅଭୟ ମହାର୍ଘ ତାଙ୍କ ଆର୍ଶିବଚନରେ
ବନ୍ଧୁ ମହାନ୍ତି ର ବନ୍ଧୁ ଶ୍ରୀ ନୀଳାଚଳ ରେ
କବି ପ୍ରଫୁଲ୍ଲ ବନ୍ଦନା ପଦ୍ମ ଶ୍ରୀ ପୟରେ
ମହା ଦୁଃଖେ ପଡ଼ିଛି ମୁଁ ତବ ଆଶ୍ରୟରେ
ଦୟାକର ଦୀନଜନେ
ରଖିଥାଅ ସୁଖେ, ଦୁଃଖେ ଚକ୍ର ଉହାଡରେ
ବନ୍ଧୁ ମହାନ୍ତି ର ବନ୍ଧୁ ଶ୍ରୀ ନୀଳାଚଳ ରେ
