ନୀଳାଚଳ ନିବାସୀ ହରି

କେ କୁହେ ତୋତେରେ ଜଗତ ଈଶ୍ୱର

କିଏ କୁହେ ମହାକାଳ

ସବୁ ଡାକ ତୋର କାନେ ପଡୁଥାଏ

କର୍ମ ଜାଣି ଦେଉ ଫଳ I

କିଏ ଡାକେ ତୋତେ ରାମ ରାମ ବେଲି

କେ ଡାକଇ ଚକ୍ରଧାରୀ

ସବୁ ନାଁ ରେ ତୁ ଗୋଟିଏ ଠାକୁର

ନୀଳାଚଳବାସୀ ହରି I

ପଦ୍ମନାଭ ନାମ ଜଗତେ ଖ୍ୟାତ ତୁ

ଲକ୍ଷ୍ମୀପତି ଜନାର୍ଦ୍ଦନ

ବଡ ମାୟାବୀ ତୁ ଚକାଆଖିଆରେ

ଶ୍ରୀଧର ମଧୁସୁଦନ I

କିଏ ଦେଖେ ତୋତେ ବାମନ ରୂପରେ

ନୃସିଂହ ରୂପରେ କିଏ

ଗୋବନ୍ଦ ନାମରେ ଡାକିଦେଲେ ଥରେ

ଜୀବ ମୁକ୍ତି ପାଇଯାଏ I

କହ କି ଅଭାବ ପଡିଲା ବୋଲିରେ

କାଠରେ ଗଢିଲୁ ତୋତେ

ସଭିଙ୍କର ଭାଗ୍ୟଡୋରୀ କଳାକାହ୍ନୁ

ଧରିଛୁ ଖଣ୍ଡିଆ ହାତେ I

ଭାବରେ ବନ୍ଧା ତୁ ଭାବ ବିନୋଦିଆ

ମାଧବ ମାଧବ ହରି

ବିଷ୍ଣୁ ନାମ ତୋର ତୁଣ୍ଡେ ଧରିଦେଲେ

ଭବସିନ୍ଧୁ କରୁ ପାରି I