ନୀଳ ସମ୍ମୋହନ
ନୀଳ ସମ୍ମୋହନ
ଭଲ ପାଇବାର ନିରିହ ପଣରେ
ଦେଖେ ତୋତେ ସଖୀ ନିତି
ଫୁଲ ବଦଳରେ କଣ୍ଟା ଫୁଟାଇ ତୁ
ରକ୍ତାକ୍ତ କରୁ ମୋ ଛାତି I
ନୀଳ ନଗରୀର ନାୟିକା ତୁ ମୋର
ନୀଳ ନୀଳ ତୋର ମନ
ତୋ ହୃଦୟ ତଳ ବିଶାଳ ଆକାଶେ
ମୁଁ ଏକ ଅଲୋଡା ଜହ୍ନ I
ନୀଳ ନିରିଜନେ ନୀଳପରୀ ତୁ ଲୋ
ନୀଳ ନୟନରେ ଚାହିଁ
ମୋ ମନତଳର ସୁନୀଳ ସାଗର
ଗଭିରତା ଦେଲୁ ଛୁଇଁ I
ନୀଳ ଉପତ୍ୟକା ଘଞ୍ଚ ବନାନୀରେ
ତୋ କଥାକୁ ଭାବି ଭାବି
ତୋ ନୀଳ ମନର ସୀମାରେଖା ଡେଇଁ
ପାଲଟି ଗଲି ମୁଁ କବି I
ନୀଳ ଆକାଶର ବିଶାଳ ଛାତିରେ
ନୀଳଜହ୍ନ ଗଲେ ଉଇଁ
ତୋ ନୀଳ ଆଖିର ଚାହୀଣୀ ଲୋ ସଖୀ
ଯାଏ ମୋତେ ଛୁଇଁ ଛୁଇଁ I
ନୀଳ ସରୋବର ନୀଳ ଜଳରାଶି
ନୀଳ ନୀଳ ପ୍ରୀତି ସ୍ୱନ
ନୀଳ ସପନର ନୀଳ ନାୟିକା ତୁ
ମୁଁ ନୀଳକଇଁର ମନ I
କେତେ ରାଗ ଋଷା ମାନ ଅଭିମାନ
ତା ବାଟରେ ଆସେ ଯାଏ
ତୋପାଇଁ ଲୋ ସଖୀ ନିତି ନୂଆ ଗୀତ
ନିଜେ ଲେଖେ ନିଜେ ଗାଏ I