ନଈ ଗାଧୁଆ

ନାନୀ ଆ.. ଗାଧି ଯିବା ନଈକୁ

ବଢ଼ୀ ପାଣି ପରା ଦେହକୁ ହିତ ଲୋ

ନିଇତି ଯିବା ସେ କୂଳକୁ।

ସୁନ୍ଦୁରୀ କରିବା ଦେହକୁ

ବାସନା ସାବୁନ, ହଳଦୀ ବଟୁଆ

ଭୁଲିବୁନି ନେଇ ଯିବାକୁ ।

ଦେହରେ ମାଲିସ ହେବାକୁ

ଅଁଳା ତେଲରୁ ନେଇଥିବୁ ଟିକେ

ମାଖି ମହକିବା ଦୁରକୁ।

ବାଡ଼ିରୁ ଆଣ ଲୋ ଜହ୍ନିକୁ

ଜହ୍ନି ଚୋପାଖଣ୍ଡେ ସାବୁନ ଲଗେଇ 

ଘସି ଦେବି ତୋ ପିଠିକୁ ।

ଚ଼ାଲୁଥିବୁ ପାଦ ଚ଼ାପି କି

ଅଙ୍କାବଙ୍କା ସେଇ ବିଲର ବାଟ ଲୋ

ଖାଲ ଖମା କାଟେ ପାଦକୁ।

ଚ଼ାଲିଚ଼ାଲି ସୁଖା ପାଦକୁ

ମୁଗୁନି ପଥର ପଡ଼ିଛି ହୁଡ଼ାରେ 

ଫଟା ଗୋଡ଼ ଘସି ହେବାକୁ ।

ମନଲାଖି ଲୁଗା ସବୁକୁ

ଯାକିଥା କାଖରେ ସମ୍ବଲପୁରୀ ଲୋ

କାଞ୍ଚଲା ବାନ୍ଧିବା ପିଠିକୁ।

ମାରିବା ଗଭା ଗଜରାକୁ 

ନାଗୁଣୀ ପରିକା ହଲେଇ ଚ଼ାଲିବା 

ଅଣ୍ଟା ତଳଯାଏଁ ବେଣିକୁ ।

ଧରିଥିବା ଦୁଇ ଚ଼ାରି ଡେକଚ଼ି

ପାଣି ଭରି ମୁଣ୍ଡରେ ବୋହି ଆଣିବା ଲୋ

ନିତ୍ୟ ବ୍ୟବହାର କରିବାକୁ ।

ଦେଖି ଆମ ଯଉବନକୁ 

ବାଟରେ ଭେଣ୍ଡିଆ ବୁଲି ଚ଼ାହିଁବେ ଲୋ

ନିଘା କରିବୁନି ତାହାଙ୍କୁ 

ନାନୀ ଆ.. ଗାଧି ଯିବା ନଈକୁ ।