Library
ନବରାତ୍ରୀ
ନବରାତ୍ରୀ
ଶରତ ଋତୁରେ ନଈ ପଠା ଧାରେ
କାଶତଣ୍ଡୀ ଫୁଲ ହସେ
ସରଗ ସୁଷମା ବଳିଠୁ ଏ ଧରା
ଅତି ମନଲୋଭା ଦିଶେ ।
ସଞ୍ଜ ନଇଁ ଆସେ ଶୁଭ୍ର ତା ପ୍ରକଟେ
ସମୀର ବହଇ ଧୀର
ସୌନ୍ଦର୍ଯ୍ଯ ବିକସେ ବାସ ତା ଚହଟେ
ମାଆ ଥାନ୍ତି ମର୍ତ୍ତ୍ୟ ପୁର ।
ନଅ ଦିନ ଧରି ପାଆନ୍ତି ସେ ପୂଜା
ଭକ୍ତ କରେ ନବରାତ୍ରୀ
ନୂଆ ବସ୍ତ୍ର ପିନ୍ଧି ଆରାଧନା କରେ
ମା ପାଦେ କରି ପ୍ରଣତୀ ।
ନିଅନ୍ତି ଭକ୍ତଙ୍କୁ କୋଳେଇ ଜନନୀ
ଦୁଷ୍ଟକୁ କରି ସଂହାର
ସନ୍ତାନର ଦୁଃଖେ ଦୁଃଖୀ ହୋଇ ମାଆ
ଝରାଏ ତା ଲୁହ ଧାର ।
ନିଷ୍ଠା ଭକତିର ବିଶ୍ୱାସ ଭରସେ
ମା ପାଦେ ମନକୁ ଦେଇ
ସକଳ ରିଷ୍ଟକୁ ଖଣ୍ଡନ କରନ୍ତି
ଜଗଧାତ୍ରୀ ମହାମୟୀ ।
ସାଜସଜ୍ଜା କେତେ ମର୍ତ୍ତ୍ୟ ପୁରେ ଚାଲେ
ମାଆ ଆଗମନ ପାଇଁ
ସବୁରି ମନରେ ଆନନ୍ଦ ଲହରୀ
ତୁଣ୍ଡେ ଦୁର୍ଗା ନାମ ଥାଇ ।
ରାବଣ ସହିତ ପ୍ରଭୁ ରାମଚନ୍ଦ୍ର
ଘୋର ସମର କରିଲେ
ରାବଣ ବିନାଶ କରିବାର ପାଇଁ
ଦୁର୍ଗା ପୂଜା ଆରମ୍ଭିଲେ ।
ନଅ ଦିନ ଧରି ପ୍ରଭୁ ରାମଚନ୍ଦ୍ର
ଦୁର୍ଗା ଆରାଧନା କଲେ
ନଅ ଦିବସରେ ନବ ରୂପ ଧ୍ୟାୟୀ
ମାଆଙ୍କୁ ନୈବଦ୍ୟ ଦେଲେ ।
ପ୍ରଥମ ଦିବସେ ଶୈଳପୁତ୍ରୀ ରୂପେ
ପୂଜିଲେ କୋଦଣ୍ଡପାଣି
ଭକତି ଭାବରେ ପୂଜିଲେ ମାତାଙ୍କୁ
ଦ୍ୱିତୀୟେ ବ୍ରହ୍ମଚାରିଣୀ ।
ତୃତୀୟ ଦିବସେ ଚନ୍ଦ୍ରଘଣ୍ଟା ମାଆ
ଚତୁର୍ଥ ଦିବସେ ତାରା
ହଳଦୀ ରଙ୍ଗରେ କେଡେ ଶୋଭା ଦିଶେ
ହସୁଥାଏ ଏଇ ଧରା ।
ପଞ୍ଚମ ଦିବସେ ବଗଳାମୁଖୀ ମା
ଷଷ୍ଠ ରେ ଯେ ଛିନ୍ନ ମସ୍ତା
ସବୁଜ ରଙ୍ଗରେ ସୁଶୋଭିତ ଦିଶେ
ଝରେ ବାତ୍ସଲ୍ୟ ମମତା ।
ସପ୍ତମ ଦିବସେ ମହାଗଉରୀ ମା
ଅଷ୍ଟ ଦିନେ ମହାକାଳୀ
ନବମ ଦିନରେ ବିନ୍ଧ୍ୟବାସିନୀ ମା
ରଖିଲୁ ପ୍ରଭୁଙ୍କ ଅଳି ।
ଦଶମ ଦିବସେ ନିଷ୍ଠେ ଭକ୍ତି ଭାବେ
ପୂଜିଲେ ସେ ବ୍ରହ୍ମପୁତ୍ରୀ
ଶହେ ଆଠ ନୀଳ ପଦ୍ମ ସମର୍ପିଲେ
ତୁମଙ୍କୁ ଶ୍ରୀରଘୁପତି ।
ଏକ ପଦ୍ମ ମାତ ହରଣ କରିଲ
ବିକଳ ପ୍ରଭୁ ହୋଇଲେ
ଗୋଟିଏ ନୟନ ତାଡିବାର ବେଳେ
ମାତ ଉପସ୍ଥିତ ହେଲେ ।
ନବରାତ୍ରୀ ପୂଜା ସମାପନ କଲେ
ଦୁର୍ଗା ଆଶୀର୍ବାଦ ଦେଲେ
ରାବଣ ବିନାଶି ସୀତାଙ୍କୁ ଉଦ୍ଧାର
କରି ଅଯୋଧ୍ୟା ଫେରିଲେ ।
ରାମଙ୍କର ନବରାତ୍ରୀ ପୂଜା
ଅସମୟେ କରିଥିଲେ
ଅକାଳ ବୋଧନ ମା ବାସନ୍ତୀ ଦୁର୍ଗା
ପୂଜା ନାମ ତାର ଦେଲେ ।
ତୋର ଏଇ ନବରାତ୍ରୀ ପୂଜା ମାଲୋ
ଯେ କରେ ବିଶ୍ୱାସ ଭରେ
ହସୁ ଥାଏ ମାଲୋ ତା ସୁଖ ସଂସାର
ପାଇ ତୋ ଆଶିଷ ବାରେ ।
ଆଶ୍ବିନ ଶରତେ ଧରେ ଅବତରୀ
ଆସୁ ମହିଷା ମର୍ଦ୍ଦିନୀ
ଅଧର୍ମ ବିନାଶି ଧର୍ମକୁ ସ୍ଥାପନ
କରୁ ତ୍ରିଶୂଳଧାରାଣୀ ।
ଜଗତ ଜନନୀ ମହିଷା ମର୍ଦ୍ଦିନୀ
ବନ୍ଦୁଛି ତୋର ଚରଣ
ଦୋଷ ଅପରାଧ କ୍ଷମା କରି ଦେବୁ
ଗଲି ମା ପାଦେ ଶରଣ ।
