ନବଦୁର୍ଗା ସ୍ତୁତି
ନବଦୁର୍ଗା ସ୍ତୁତି
ଆଶିଣ ମାସର ହିମ କାକର ରେ
ଆସିଅଛ ମାତା ଦୁର୍ଗା
ଶକ୍ତିମୟୀ ତୁମ୍ଭେ ନବଦୁର୍ଗା ରୂପେ
ଜଗତେ ପାଉଛ ପୂଜା
ଶକ୍ତି ଉପାସକ ସାଧକ ସାଧଇ
ଯତନରେ ନବରାତ୍ର
ଚଞ୍ଚଳ ମନକୁ କରି ଅଚଞ୍ଚଳ
କାୟା କରିଣ ପବିତ୍ର
ପ୍ରଥମରେ ତୁମ୍ଭ ଶୈଳପୁତ୍ରୀ ରୂପ
ହିମାଳୟ ରାଜସୂତା
ବୃଷାରୂଢ଼ା ମାତା ଶୂଳ ପଦ୍ମହସ୍ତା
ଭାଲଚନ୍ଦ୍ର ସୁଶୋଭିତା
ଶତ ସୂର୍ଯ୍ୟ ନିନ୍ଦି ତୁମ୍ଭର ପ୍ରକାଶ
ମୂଳାଧାରେ ଥୋଇ ମନ
ପ୍ରଥମ ଦିନରେ ସାଧକ ପୂଜଇ
ସମର୍ପି ନିଜର ପ୍ରାଣ
ଦ୍ଵିତୀୟ ଦିନରେ ଶ୍ରୀ ବ୍ରହ୍ମଚାରିଣୀ
ତପଶ୍ଚାରିଣୀ ଜନନୀ
କରି ଘୋର ତପ ଶିବଙ୍କୁ ଲଭିଲ
ମହାଦେବ ଅର୍ଦ୍ଧାଙ୍ଗିନୀ
ଅପର୍ଣ୍ଣା ମା ଉମା ନାମ ହେଲା ଖ୍ୟାତ
କୋଟି ସୂର୍ଯ୍ୟ ସମ ଜ୍ୟୋତି
ହେ କଲ୍ୟାଣମୟୀ ଭକତ ପୂଜଇ
ସ୍ଵଧିଷ୍ଠାନେ ଦେଇ ମତି
କରେ ଧରିଥାଅ ଜପାମାଳା ଗୋଟି
ଅନ୍ୟ ହସ୍ତେ କମଣ୍ଡଳୁ
ତୁମ୍ଭ ଆଶିଷରେ ପଙ୍ଗୁ ଲଙ୍ଘେ ଗିରି
ନିର୍ଭୟ ହୁଏ ଭୟାଳୁ
ଚନ୍ଦ୍ରଘଣ୍ଟା ରୂପ ତୃତୀୟ ଦିବସେ
ଲାଲଟେ ଶଶାଙ୍କ ଶୋହେ
ପ୍ରସନ୍ନ ବଦନା ମା ସିଂହବାହିନୀ
ରୂପ ତ୍ରିଭୁବନ ମୋହେ
ଅଷ୍ଟଭୁଜା ତୁମ୍ଭେ ଧାରଣ କରିଛ
ଖଡ୍ଗ ପଦ୍ମ ଧନୁ ଶୂଳ
କମଣ୍ଡଳୁ ବାଣ ଗଦାଧାରିଣୀ ମା
କଣ୍ଠେ ଶୁଭ୍ର ପୁଷ୍ପମାଳ
ସୃଷ୍ଟି ରଚୟିତା ହେ କୁଷ୍ମାଣ୍ଡା ମାତା
ଚତୁର୍ଥରେ ତୁମ୍ଭ ରୂପ
ବ୍ୟାଘ୍ରାସନା ଦେବୀ ଅଷ୍ଟଭୁଜା ତୁମ୍ଭେ
ସ୍ମରଣେ ଖଣ୍ଡଇ ପାପ
ଅମୃତ କଳସୀ ହସ୍ତରେ ଧରିଛ
ଧନୁ ଚକ୍ର ପଦ୍ମ ଗଦା
ଚାପ କମଣ୍ଡଳୁ ଅକ୍ଷମାଳା ଧାରୀ
ସ୍ମିତହାସ୍ୟ ମୁଖେ ସଦା
ପଞ୍ଚମ ରେ ତୁମ୍ଭ ସ୍କନ୍ଦମାତା ରୂପ
କୋଳେ ଧରି କାର୍ତ୍ତିକେୟ
ପଞ୍ଚାସ୍ୟ ଆରୁଢା କମଳ ଧାରିଣୀ
ସନ୍ତାନେ ଦିଅ ଅଭୟ
ହେ ଜଗଜ୍ଜନନୀ ମାତୃ ରୂପ ତୁମ୍ଭ
ଦିଶେ କେଡେ ମନୋହର
ଶାନ୍ତ ଶୁଭ୍ର ଜ୍ୟୋତି ତୁମ୍ଭ ଅଙ୍ଗ କାନ୍ତି
ଦର୍ଶନେ ପାତକ ଦୂର
ମହିଷାମର୍ଦ୍ଦିନୀ କାତ୍ୟାୟନୀ ରୂପ
ଷଷ୍ଠ ଦିବସରେ ହୁଅ
ଚତୁର୍ଭୁଜା ତୁମ୍ଭେ ହେ ସିଂହବାହିନୀ
ସନ୍ତାନେ ଅଭୟ ଦିଅ
ଅଭୟ ବରଦ ମୁଦ୍ରା ସୁଶୋଭିତା
ଖଡ୍ଗହସ୍ତ ପଦ୍ମକର
ସର୍ବ ଦେବାଦେବୀ ତେଜ ଘେନି ମାତା
ଅଗ୍ନିରୁ ଜନମ ହେଲ
ସପ୍ତମ ଦିବସେ ଜଗତ ଜନନୀ
ରୂପ ତୁମ୍ଭ କାଳରାତ୍ରୀ
ବିଦ୍ୟୁତ୍ ସମ ପ୍ରଭା ତ୍ରିଲୋଚନୀ ମାତା
ଦୁଷ୍ଟ ମନେ ଦିଅ ଭୀତି
ଖରାସନା ଦେବୀ ମଧୁକୈଟଭ ଦଳିନୀ
ଶୁମ୍ଭନିଶୁମ୍ଭ ନିର୍ଘାତି
ଅଭୟ ବରଦା ଲୌହଖଡ୍ଗ ଧାରୀ
ଘନ କୃଷ୍ଣ ଅଙ୍ଗ କାନ୍ତି
ମହାଷ୍ଟମୀ ଦିନ ମହାଗୌରୀ ରୂପ
କୁନ୍ଦ ପୁଷ୍ପ ପ୍ରାୟ ଶୋଭା
ଶ୍ଵେତପୁଷ୍ପ ମାଳା ବିଧୁ ସୁଶୋଭିତା
ଅନ୍ନପୂର୍ଣ୍ଣା ଆଦିମାତା
ଡମ୍ବରୁର ନାଦ ବୃଷଭ ଅରୁଢା
ହସ୍ତେ ତ୍ରିଶୂଳ ଶୋଭିତ
କରି ଘୋର ତପ କୃଷ୍ଣ ହେଲା ଅଙ୍ଗ
ଗୌର କଲେ ଭୋଳାନାଥ
ଅନ୍ତିମ ଦିବସେ ମାତା ସିଦ୍ଧିଦାତ୍ରୀ
ରିଦ୍ଧି ସିଦ୍ଧି ନିଧି ଦାତ୍ରୀ
ସର୍ବ ମନୋରଥ ପୂର୍ଣ୍ଣ କର ମାତ
ନମଃ ନମଃ ସିଦ୍ଧେଶ୍ୱରୀ
ଆଦି ପରାଶକ୍ତି ନିର୍ଗୁଣ ସ୍ୱରୂପା
ଈଶ୍ୱରଙ୍କ ବାମ ଭାଗୁ
ଆବିର୍ଭୁତା ହେଲ ସୃଷ୍ଟି ର ପ୍ରାରମ୍ଭେ
ଅର୍ଦ୍ଧାନାରୀଶ୍ୱର ଅଙ୍ଗୁ
ଚତୁର୍ଭୁଜା ତୁମ୍ଭେ ଶଙ୍ଖ ଚକ୍ର ଗଦା
ପଦ୍ମ ହସ୍ତେ ସୁଶୋଭିତା
ଅଷ୍ଟସିଦ୍ଧି ଦାତ୍ରୀ ମା ସିଂହବାହିନୀ
ସରସିଜେ ବିରାଜିତା
ନବଦିନେ ନବ ରୂପରେ ପୂଜିତା
ନବଶକ୍ତି ଆଦିମାତା
ତୁମ୍ଭର ମହିମା ଦେବେ ଅଗୋଚର
ଧ୍ୟାୟନ୍ତି ସର୍ବ ଦେବତା
ଇନ୍ଦ୍ର ବେଦପତି ଆବର ଦେବତା
ତୁମ୍ଭ ମାୟା ନ ଜାଣନ୍ତି
ଅଳପ ବୁଦ୍ଧିରେ କିପରି ବର୍ଣ୍ଣିବ
ଅଜ୍ଞାନ ମୂଢ ଦୁର୍ମତି
କ୍ଷମାମୟୀ ତୁମ୍ଭେ ସଦ୍ୟଫଳ ଦାତ୍ରୀ
ସର୍ବ ଦୋଷ ମୋର କ୍ଷମ
ବାଳୁତ ସ୍ୱଭାବେ କରେ ଆଚରଣ
ମାତା ଦିଅ ହେ ଶରଣ
ହେ ବିଶ୍ଵଜନନୀ ହେ ଜଗଜ୍ଜନନୀ
ଶିବା ଅମ୍ବା ଜଗଦ୍ଧାତ୍ରୀ
ଅଳପ ଜ୍ଞାନରେ କରିଛି ବଖାଣ
ତୁମ୍ଭ ରୂପ ନବରାତ୍ରୀ
ଦୋଷ ଥିଲେ ମାତ ନ କରିବ ରୋଷ
ବାଳକ ଭାବି କ୍ଷମିବ
ତୁମ୍ଭେ ନ ରଖିଲେ ଆହେ ମହାମାୟୀ
ଅଧମ ନାବ ବୁଡିବ
ଶ୍ରୀପୟରେ ପଡି କରୁଛି ମାଗୁଣି
ଦଣ୍ଡବତ ଶତଶତ
ଦୀନ ହୀନ ମୁହିଁ ଅଧମ ଅରକ୍ଷ
ରକ୍ଷା କର ଆଦିମାତ ।