ନାରୀମାଗେ ନ୍ୟାୟ

ନିରୀହ ନିଷ୍ପାପ ଶରୀର ମୋହର 

ଟିକି ଟିକି ସ୍ୱପ୍ନ ମୋର, 

ଦୁନିଆଁକୁ ଟିକେ ଚିନ୍ହିଵା ଆଗରୁ 

କାଟିଲା କିଏ ମୋ ପର |

ମାଆର ଥିଲି ମୁଁ ଅଲିଅଳି କନ୍ୟା 

ବାପାଙ୍କ ଗେଲବସର, 

ମୋ ଅଳି ଅର୍ଦଳି ଅଝଟ ପଣରେ 

ପୁରି ଉଠୁଥିଲା ଘର |

ନିଷ୍ପାପ କଢ଼ିକୁ ପାଦରେ ଦଳିଲା 

କିଏ ସେ ପିଶାଚ ନର, 

ମୋଦେଶରେ ଯେତେ କନ୍ୟାପିତା ଅଛ 

ଟିକିଏ କର ବିଚାର |

ଆମ ସମ୍ବିଧାନ ନିୟମ ଗଢିଲା 

ପରକୀୟା ପ୍ରୀତି ପାଇଁ, 

ନାରୀକୁ ଭାବିଲା ଭୋଗ୍ୟ ବସ୍ତୁଟିଏ 

ସୁରକ୍ଷା ଯେ ଦିଏ ନାହିଁ |

ଯେଉଁ ନାରୀପାଇଁ ଜନମ ତାହାର 

ତାପରେ ଲୋଲୁପ ଦୃଷ୍ଟି, 

ସରକାର କୁହନ୍ତି ପଢ଼ାଓ ବେଟିଙ୍କୁ 

ବଚାଓ ବଚାଓ ବେଟି |

ସବୁପାଇଁ ଗଢ଼ୁଅଛ ସମ୍ବିଧାନ 

ମୋହର ଦେଉଛ ମାରି, 

ନାରୀର ସୁରକ୍ଷା ପାଇଁ କି ନିୟମ 

କେଉଁ ଧାରା ଅଛ କରି |

ନିରୀହ ମୁହଁକୁ ଦେଖିପାରୁନାହଁ 

ଦେଖୁନାହଁ ତାର କୋହ, 

କଅଁଳ ପ୍ରାଣକୁ ଝୁଣି ଖାଉଅଛ 

କେମିତି ସହୁଛି ଦେହ |

ଆଇନ କାନୁନ ବଦଳାଇ ଦିଅ 

ନୂତନ ନିୟମ ଆଣି, 

ଦୋଷୀ ଦୋଷ ପ୍ରମାଣିତ ହେଇଗଲେ 

ଫାଶୀରେ ଚଢାଅ ଟାଣି |

ନାରୀର ସୁରକ୍ଷା ଯଦି ଚାହୁଁଥାଅ 

ଏ ନିୟମ ଲାଗୁ କର, 

ଲକ୍ଷେ ଥର ଚିନ୍ତା କରିବ ପାମର 

କରିବାକୁ ବ୍ୟଭିଚାର |

ନାରୀଟିଏ ହୋଇ ଗୁହାରି କରୁଛି 

ଶୁଣ ମୋ ଦେଶ ଶର୍କାର, 

ନାରୀକୁ ଫେରାଅ ଅଧିକାର ତାର 

ସ୍ୱପ୍ନ ତା କର ସାକାର |