ନାରୀ ଜାଗରଣ ହୋଇଛି

ଯୁଗ ବଦଳିଛି ସମାଜରେ ଆଜି ନାରୀ ଜାଗରଣ ହୋଇଛି

ଚଷମା ଲଗାଇ ବେଣୀ ଦୋହଲାଇ ପାରବତୀ ନାନୀ ଯାଉଛି|

ପବନା ଭାଇକୁ ବାବନା ବନାଇ ପିଣ୍ଢାରେ ବସାଇ ଦେଇଛି

ସ୍ୱୟଂସହାୟିକା ଗୋଷ୍ଠୀ ମହାସଂଘେ ସଭାନେତ୍ରୀ ସିଏହୋଇଛି।

ଗାଆଁରେ ମହିଳା ସଭା କରୁଛନ୍ତି ଯୋଜନାତ ଭଳି ଭଳିକି

ରୋଜଗାରକ୍ଷମ ହୋଇବେ ସେମାନେ ପୁରୁଷଙ୍କୁ ଯିବେ ବଳିକି|

ଘରୁ ଗୋଡ଼କାଢ଼ି ଘରଣୀମାନେତ ମାଗିଲେଣି ତାଙ୍କ ରାଇଟ

ପାଦେ ହାଇହିଲ ହାତରେ ଫାଇଲ କାନ୍ଧରେ ପକାଇ ଭ୍ୟାନିଟ|

ଲଜ୍ଜ୍ୟା ଶରମକୁ ପୋଡ଼ିକି ଖାଇଲେ ଓଢ଼ଣା ଗଲାଣି ଚୂଲିକି

ଦେଢଶୁର ମଳାଶୁର ଗୁରୁଜନେ କଥା ହେଲେ ଖୋଲା ଖୋଲିକି|

ମସଲା ଛତୁଆ ଛତୁ ମାଛଚାଷ ଜର୍ସି ଗାଈ ଘରେ ପାଳିକି

ଧୂପକାଠି ଖଲି ଠୁଙ୍ଗା ବଡ଼ି ଖଟା ପାମ୍ପଡ଼ ମିକ୍ସଚର କରିକି |

ସିଲେଇ ଶିଖିକି ହିସାବ ରଖିକି ବ୍ୟାଙ୍କରୁ ଋଣ ଆଣିକି

ଠିକଣା ବାଟରେ ଖରଚ କରିକି ଭିନ୍ନ ଭିନ୍ନ ଧନ୍ଦା ଧରିକି |

ନିଶା ନିବାରଣ ନାରୀ ନିର୍ଯ୍ୟାତନ ଦୁଷ୍କର୍ମ ଦମନ ପାଇଁକି

ଏକଛତ୍ରବାଦୀ ପୁରୁଷ ପ୍ରଧାନ ସମାଜେ ଟକ୍କର ଦେଇକି |

ରାଜ୍ୟ ସରକାର ଜୀବିକା ମିଶନ ତୃପତି ପ୍ରକଳ୍ପ ଖୋଲିଛି

ସକଳ କ୍ଷେତ୍ରରେ ପୁରୁଷଙ୍କ ସହ ତାଳ ଦେଇ ନାରୀ ଚାଲିଛି |

ନନ୍ଦିନୀ ଅପାକୁ ପାର ସର ଚମ୍ପା ଶୁକୁଟା ବୋଉକୁ ଧରିକି

ସରପଞ୍ଚ ଆଉ ବିଡ଼ିଓ ଦୁହିଁଙ୍କୁ ପ୍ରଶ୍ନବାଣେ ଦେଲେ ସାରିକି |

ବିଧାୟକ ଆଗେ ବିଧା ମାରି ସିଏ ଦାବିକୁ ହାସଲ କରନ୍ତି

ସାହସ ତାଙ୍କର ଦେଖିଣ ପୁରୁଷେ ଡରିମରି ଘରେ ରହନ୍ତି |

ମଦ୍ୟପ ମାତାଲ ଠକ ଟାଉଟର ନୀତି ଚଳିବନି ଏଣିକି

ନାରୀତ ଦଉଡ଼ି ପୁରୁଷତ ଗାଈ ଚାଲିବ ଟାଣିବ ଯେଣିକି |