ନା ଖାଆନା

ଚକୋଲେଟ ମନା ଦାନ୍ତ ହେବ କ୍ଷୟ

   ରସଗୋଲା ଆଣେ ଡାଇବେଟିସ

କୁରୁକୁରି ମଜା  ନେବାନାହିଁ ଜମା

   ଭୋକ ମାରିଦେବ ପରା ଚିପସ ll

ଗୁପଚୁପ ଝୋଳ  ପାଟି ବୁହେ ଲାଳ

   ଖଟା ପାଣି ଝାଳ ନଖ ବୁଡୁଛି

ଆଇସି କ୍ରିମ ଟି ମନ ନିଏ ଟାଣି

  ଓଜନ ବଢ଼େଇ ସିଏ ଦେଉଛି ll

ଚାଉମିନି ରୋଲ  ପିଜା ବରଗର

  ତେଲ ଛଣା ଖାଦ୍ୟ ଲାଗେ ସ୍ୱାଦିଷ୍ଟ 

ଶରୀର ଫୁଲଇ  ମେଦ ବୃଦ୍ଧି କରି

  ବାର୍ଦ୍ଧକ୍ୟ ଆଣିକି ଦିଅଇ କଷ୍ଟ ll

ୟୋ ୟୋ ମ୍ୟାଗି ଇପି  ଚଟକିନା ଭିଜି

  ଆଦରେ ଆନନ୍ଦେ ଝପଟି ଖାଉ

ପାଚନ ତନ୍ତ୍ରକୁ  ଦୁର୍ବଳ କରାଉ

  ଯକୃତ ରୋଗକୁ ଟାଣି ଆଣଉ ll

ଚିକେନ ମାଂସରେ  ହରମୋନ ଭର୍ତ୍ତି

  ଗାଈର କ୍ଷୀରରେ ରହୁଛି ବେଶୀ

ଛଅ ମାସକର  ଆମ୍ବର ଡାଳରେ

   ଆମ୍ବ ଫଳିଅଛି ଖାଉଥା ବସି ll

ପରିବାରେ ବିଷ ବୋଳି ମାଛେ ବିଷ

  ବେପାର ହେଉଛି ସତେ ସତେଜ

ପାଟିକୁ ଆନନ୍ଦ  ପେଟ ନିରାନନ୍ଦ

  ଆଣ୍ଟାସିଡ ଖାଉ ମନକୁ ହେଜ ll

ଘିଅରେ ମୋବିଲି  ତେଲ ଯେ ନକଲି

  ମସଲା ମିଳୁଛି ହୋଇ ପ୍ୟାକେଟ

ଅନେକ ଫ୍ଲେଭର  ବାସନା ଭରିକି

  ମନ ମୋହୁଅଛି ସାରା ମାର୍କେଟ ll

ଫଳ ପାଚୁଅଛି  ଯେ କେମିକାଲରେ

 ଖାଦ୍ୟରେ ଭରିଛି ଅନେକ ବିଷ

କଣ ଖାଇକରି  ସୁସ୍ଥ ରହିବାଟି

 ବିଷ ଭରିଅଛି ଯେ ପରିବେଶ ll

ପାନ ବିଡି ଗଂଜା  ମଦରସ ହୁକା

   ଅଫିମ ଚରସ ମାଦକ ଦ୍ରବ୍ୟ

କରେ ଅପକାର  ନ କର ଆଦର

  କଣ ଖାଇବାଯେ ଟିକିଏ ଭାବ ll

ଦେହ ମସ୍ତିସ୍କ ରେ ବିଷ ଭରିଅଛି

 ଖାଦ୍ୟର ବିଷକୁ କିଏ ପଚାରେ

ସିଝାଇ ଫୁଟାଇ  ପରିଷ୍କାର କରି

  ସୁଷମ ଖାଦ୍ୟକୁ ନିତି ଖାଅରେ ll