ନ ଖୋଜିଲା ହାତ ଖାଲି

ସେ' ତ ଖୋଜୁଥାଏ ମାଟିର କୋଳଟେ

                           ହେବାପାଇଁ ଟିକିଚାରା

             ବଡ଼ ହୋଇ ଦେବ ସୁଶୀତଳ ଛାଇ

                           ଆଣିଦେବ ବାରିଧାରା ।

             ସେ' ତ ଖୋଜୁଥାଏ ଅନୁକୂଳ ପାଗ

                           ଧୀର ମଉସୁମୀ ବାଆ

             ଧରା ଛାତିପରେ ଝର ଝର ହୋଇ

                           ବରଷିଯିବାକୁ ଆହା ।

             ସେ' ତ ଖୋଜୁଥାଏ ସଜ ସକାଳଟେ

                           ଫୁଟିବାକୁ ଫୁଲ ହେଇ

             ଖୁସି କରିବାକୁ ଚାହେଁ ସେ ସଭିଙ୍କୁ

                           ମିଠା ବାସ ତା'ର ଦେଇ ।

             ସେ' ତ ଖୋଜୁଥାଏ ସୁଗମ ବାଟଟେ

                           ଆଗକୁ ବଢ଼ିବ ବୋଲି

             ଆପଣା ଇଚ୍ଛାରେ ମିଶିବ ସାଗରେ

                           ମନକଥା ଦେବ ଖୋଲି ।

             ସେ' ତ ଖୋଜୁଥାଏ ଗଛର ଡାଳରେ

                           ନୂଆ ପତରର ଶୋଭା

             ସୁଲଳିତ ସୁରେ ଗାଇବାକୁ ଗୀତ

                           ଯାହା ଭାରି ମନଲୋଭା ।

             ସେ' ତ ଖୋଜୁଥାଏ ଆଶରା ଗୋଟିଏ

                           ଆଣିଦେବ ତାକୁ କିଏ

             କବିତା ହେଉ ବା ହେଉ ସେ ବନିତା

                           ଲତା ହେଉ ଅବା ସିଏ ।

             ସେ' ତ ଖୋଜୁଥାଏ ତା' ପସନ୍ଦ କାମ

                           କରିଯିବ ନିତି ନିତି

             ନିଜ ଅଭିଳାଷ କରିବ ପୂରଣ

                           ଜୀଉଥିବ ଜିତି ଜିତି ।

             ଖୋଜାଖୋଜି ହାତ ସରଗକୁ ଛୁଏଁ

                           ଆଜି ହେଉ ଅବା କାଲି

             ଯେ' ଯେମିତି ଖୋଜେ ସେ ସେମିତି ପାଏ

                           ନ ଖୋଜିଲା ହାତ ଖାଲି ।