ନ ଖାଇଲେ ଭଲ

ମାତୃଦେବୀ ଉବାଚ -

ମାଆ କହେ ଚଗଲାକୁ  ଚକୋଲେଟ୍ ଖାଆନି

ଚାଉମିନ୍ ,ବରଗର,   ପିଜାକୁ ତୁ ଛୁଉଁନି ll 

ଥଣ୍ଡା ବୋତଲର ପାଶେ  ଧନ ମୋର ଯାଆନି

ଯେତେ ଯିଏ ଯାଚିଲେ ତୁ ଆଇସ୍ କ୍ରିମ ଖାଆନି ll 

ଏ ସବୁ ଭେଜାଲ ଆଜି  ନାହିଁ କିଛି ଅସଲି

ଖାଇ କାହିଁ ମିଛଟାରେ ଛାଡିବୁ ତୁ ବୋବାଳି ll

ଗୁପ୍ ଚୁପ୍ ଖଟା ପାଣି ଦେଖି ଲାଳ ଗଡାନି

ଭେଲପୁରି, ଦହିବରା ହେଉ ଚାଟ୍ ଘୁଗୁନି ll

ପତ୍ନୀଦେବୀ ଉବାଚ-

ଖାଅନି ପଖାଳ କେବେ ଦେହରେ ତ ଯାଉନି

ବୟସ ହେଲାଣି ଏବେ ହଜମ ତ ହଉନି ll 

ରାଗ ମିଶା ତରକାରି ତେଲ ଭାଜି ମସଲା

ଖାଇବାକୁ ଜିଭ ତୁମ ହୁଏ ଭାରି ଚଗଲା ll

ଏ ସବୁ ଖାଅନି ଜମା ଅଟେ ସେତ ଭଗାରୀ

ମଧୁମେହ ରକ୍ତଚାପ ନିଏ ସବୁ ଆଦରି ll

ଖାଅନାହିଁ ଲୁଣ ବେଶି ପିଅ ନାହିଁ ବିଦେଶୀ

ନ ରୁଚିଲେ ତୁଣ୍ଡେ ପିତା ଟିକେ ଦିଅ ଗିରାସି ll 

ପାନ ବିଡି ସିଗାରେଟ ସାଙ୍ଗମେଳେ ଚିକେନ

ଛୁଅଁ ନାହିଁ କେବେ ତାକୁ ପକାଇଲି ମୋ ରାଣ ll

ପିତା -ପୁତ୍ର ଉବାଚ-

ରାଗି କହେ ଚଗଲାଟା କାହାକୁ ଯେ ଖାଇବି

ନ ଖାଇଲେ ଭଲ ହେବ ପାଣି ପିଇ ଶୋଇବି ll

ଚଗଲା ବାପାର ରାଗ ବଢି ଗଲା ଦିଗୁଣ 

ନ ଖାଇଲେ ଭଲ ହେବ ଯାଉ ପଛେ ମୋ ପ୍ରାଣ ll