ମ୍ୟାଜିକ୍

ଗୋଟେ ମ୍ୟାଜିକ ବୋତଲ 

ଯାହା ଭିତରେ ବନ୍ଦ ହେଇପାରେ ଜୀନି 

ଯିଏ ଦେଇପାରେ ପାର୍ଥିବ କିଛି ଇଚ୍ଛା ତାଲିକାକୁ ରୂପ

ହେଲେ ମୁଁ ଯଦି ଏ ପାର୍ଥିବ ସବୁର ଧାର ନ ଧରେ

ଯଦି ମୁଁ କହେ, "ମତେ ଆକାଶ ଦେ ସ୍ୱପ୍ନ ଦେ

ହସ ଦେ ମୁକ୍ତି ଦେ ମତେ ମୋ ମୁତାବକ ଶାନ୍ତିର ଜୀବନଟେ ଦେ"।

ପାରେ କଣ କୋଉ ଜୀନି 

ତା ହାତକଥା ପାଉତାରେ ଲେଖାଥାଏ କଣ ଏତେ ସବୁ ?

ପୁଣି ସିଏ କଣ ଆଉ ଈଶ୍ୱର?

ଓଦରା ଗଛ ଦିଟା ଖୁଣ୍ଟ ପରି ଠିଆ ହେଇ କଥା ହେଲେ ।

" ନା ତୋର ଚେର ଅଛି ନା ମୋର "

ତେବେ ଶୂନ୍ୟ ଝୁଲନ୍ତା ଏ ଦେହଟା ପାଇଁ ଏତେ ମାୟା କାହିଁକି ।

ଏତେ କଷ୍ଟ କଣ ମୁକୁଳିବା 

ହାତରେ ଖୋଲିହେଉଥିବା ସୂତା ଫାଶଟେରୁ 

ଏଇ ତ ଟିକିଏ ଧୈର୍ଯ୍ୟ ଲୋଡା ।

ବାସ୍ ।

ଜୀନି ହସେ  

ଖୁବ୍ ହସେ ଅଟ୍ଟହାସ୍ୟ ରୋଳ ଛୁଟାଏ 

ବୋତଲ ଭିତରୁ 

କହେ, "ଯଦି ଏତେ ସରଳ

ତେବେ ମୁଁ କାଇଁ ବଞ୍ଚିଛି ସହସ୍ର ବର୍ଷର ବନ୍ଦୀ ହେଇ

ଏଇ କାଚର ଟିକି ବୋତଲଟିରେ ?"