ମୂଲ୍ୟବାନ ଜୀବନ
ମୂଲ୍ୟବାନ ଜୀବନ
ସୂର୍ଯ୍ୟର କିରଣ, ଚନ୍ଦ୍ରର ଚାନ୍ଦିନୀ
ନଦୀ ର ମର୍ମର, ପ୍ରପାତ ରାଗିଣୀ
ସାଗର ଲହରୀ, ପକ୍ଷୀଙ୍କ କାକଳୀ
ଜୀବନେ ଆନନ୍ଦ ହେବନାହିଁ କଳି! l
'ପୋଦିନା' ନିମ୍ବ' ଓ 'ଇଉକାଲିପ୍ଟସ'
'ପେୟ', 'ଲେପ' ଏବଂ 'ଆଘ୍ରାଣେ' ସରସ
'ଲଭେଣ୍ଡର' 'ରୋଜମେରୀ' 'କାମୋମିଲ'
ମନ ଓ ପ୍ରାଣ ହସିବେ ଖିଲିଖିଲ l
ମନେଇଁ ନିଅ 'ଜିଭ'କୁ ବାରି ସ୍ୱାଦ
"ସ୍ୱାସ୍ଥ୍ୟ ହିତେ' କରିବନି ପ୍ରତିବାଦ
'ଧଳା ଶର୍କରା' ଓ ଚିନି ଠାରୁ ଦୂର
ମନ ଦୃଢ଼ ହେଲେ, ଲଙ୍ଘିଵ ପ୍ରାଚୀର l
ମୁକ୍ତ ଆକାଶରେ ତାରା ନିରୀକ୍ଷଣ
ଉପଭୋଗ କର 'ସମୀର' ଚୁମ୍ବନ
ଅନୁଭବ କର ବର୍ଷା ଆଲିଙ୍ଗନ
ମିଳିବ ଖୁସିର 'ଅ-ସରା ପ୍ଲାବନ' l
ନଗ୍ନ ପାଦେ କର ଭୂମି ପ୍ରଦକ୍ଷିଣ
ସ୍ପର୍ଶ କର ଯେତେ ଲତା-ଗୁଳ୍ମ-ତୃଣ
ମିଳିବ ଯେବେ ବି 'ଶିଶିର' ପରଶ
ଉଲ୍ଲସିତ ହେବ ଶରୀର ଅବଶ୍ୟ! l
ଶୁଣିପାର ଯଦି 'ଅନ୍ତରର ସ୍ୱର'
ଧ୍ୟାନ ଦେଇ ଶୁଣ ତାହା ବାରମ୍ବାର
ଜଗତକୁ ଦେଖ 'ସ୍ଫୁରିତ ନୟନେ'
'ଫୁର୍ତ୍ତିଲା ଧୀ-ଶକ୍ତି' କାର୍ଯ୍ୟ ସମାପନେ l
'କୁଦ' 'ନାଚ' 'ଗାଅ' ଯାହା ପ୍ରୀତିକର
ଅପାର ଆନନ୍ଦେ ହୋଇଯା' ବିଭୋର
ଭଲପାଇବା ହିଁ 'ସୁନ୍ଦର ଶାଶ୍ୱତ'
ରୋଗ 'ଉପଚାର' 'ନିଦାନ' ସତତ l
'ଏଇ ଜୀବନ'ରେ ଏଇ ତ 'ମୁହୂର୍ତ୍ତ'
'ଗତାଗତ' ଭ୍ରମ, 'ଏଇ କ୍ଷଣ' ସତ୍ୟ
ଏହାହିଁ ମଧୁର ଜୀବନର ଗୀତ
'ବିପଦେ ଆପଦେ' ଅଟେ 'ଦେବଦୂତ' l