ମୁଁ ରହିଛି ଚାହିଁ

ଛିଡା ହୋଇଛି ମୁଁ

ଅଧା ଖୋଲା ଝରକା ପାଶେ

ଦେଖୁଛି ଦୂର ଆକାଶେ

ଯେଉଁଠି ଖେଳୁଛି ସୁରୁଜର ଛିଟାଏ ସୁନେଲି କିରଣ

ସକାଳର କାକର ବିନ୍ଦୁରେ ସଜେଇ ହୋଇ

ହସୁଛି ବଗିଚାର ଗେଣ୍ଡୁ ଗୋଲାପ

ହାତ ଠାରି ଡାକୁଛି ମୋତେ

ବ୍ୟସ୍ତତାର ସମ୍ଭାର ନେଇ

ଦୈନଦିନର ବ୍ୟସ୍ତ ଜଞ୍ଜାଳ

ପବନରେ ଖେଳୁଛି ଦୋଳି

ଫଗୁଣର ରଙ୍ଗେ ଆମ୍ବ ବଉଳ

କୋଇଲିର କୁହୁତାନ

ଦେଉଛି ମୋତେ ପ୍ରେମର ପରଷ

ସଞ୍ଜ ଗଲାଣି ନଇଁ

ରୁପସୀ ରାତି ସାଜିବ ଅଭିଶାରିକା

ଘୁମର କେଶରେ ସଜାଇବ ତାରକାର ମଲ୍ଲୀ ମାଳ

ଜହ୍ନ ଝରାଇବ ଜୋଛନା

ଝିଙ୍କାରି ଗାଇବ ଗୀତ

ହେଲେ ତୁମେତ ଆସିଲ ନାହିଁ

ଶୁଭିବନି ତୁମ ନୁପୁର ଶବ୍ଦ

ଏ ନିଶଙ୍ଗ ଜୀବନେ କିଏ ଭରିବ ରଙ୍ଗ.

ମୋ ମନର ଫୁଲ ବନକୁ କିଏ କରିବ ବାସ୍ନାୟିତ

ତଥାପି ମୁଁ ରହିଛି ଚାହିଁ ଏ ଶୀତ ରାତିରେ

ଦେଖିବାକୁ

ଶୀତ କାକର ଭିଜା ଓଢଣୀରେ

ନବ ବଧୁର ରୂପ ମାଧୁରୀ