ମୁଁ କୃତଘ୍ନ
ମୁଁ କୃତଘ୍ନ
ଜନନୀ ଜଠରେ ଯେଉଁ ମୁହୁର୍ତ୍ତରେ
ଦିବ୍ୟ ସ୍ମୃତି ଦେଲ ଢ଼ାଲି ।
ଶତେକ ଜନ୍ମର ସ୍ମୃତି ହୁଏ ମୋର
ତବ ନାମ ନେବି ବୋଲି . . .
ଭୁଲିଗଲି ଭୁଲିଗଲି ପ୍ରଭୁ ଭୁଲିଗଲି ଭୁଲିଗଲି ।। ଠ।।
ରୁଦ୍ଧ କୋଠରୀରେ ଆବଦ୍ଧ ଭାବରେ
ରକ୍ତ-ନାଳ-ପୁରିଷେଣ ,
କୀଟଙ୍କ ଦଂଶନ ସହି ନ ପାରିଣ
ମୁଖେ ଡାକେ ତ୍ରାହି ବୋଲି . . .
ରଖ ଦୀନବନ୍ଧୁ ବୋଲି ପ୍ରଭୁ ଭୁଲିଗଲି ଭୁଲିଗଲି । ୧।
ତୁମ୍ଭ ଦୟାବଳେ ଦୃଶ୍ୟ ସେହି କାଳେ
ଶତେକ ଜନ୍ମର କର୍ମ,
ଆହେ ଦୟାମୟ ହୋଇଣ ସଦୟ
ନେଲବାରେ ଥରେ ତୋଲି. . . .
ଦୟାମୟ ବନମାଳୀ ପ୍ରଭୁ ଭୁଲିଗଲି ଭୁଲିଗଲି । ୨।
ବାରମ୍ଵାର ସ୍ତୁତି କରିଣ ବିନତୀ
ସତ୍ୟ କଲି ଦୟାମୟ,
ରୁଦ୍ଧ ଗର୍ଭଗତୁ ଉଦ୍ଧାରିବା ହେତୁ
ଶ୍ରୀପଦେ ଶରଣ ଗଲି. . . .
ଡାକ ଶୁଣ ବନମାଳୀ ପ୍ରଭୁ ଭୁଲିଗଲି ଭୁଲିଗଲି ।୩।
ମୁକ୍ତି ଦେଲବୋଲି ଭୂ-ପୃଷ୍ଠେ ପଡ଼ିଲି
ମାୟାରେ ମୁଁ ଭ୍ରମି ଗଲି,
ମାୟାର ବନ୍ଧନେ ପଡିଲି ତକ୍ଷଣେ
କୁଆଁ କୁଆଁ ରାବ କଲି . . . .
ନାମ ରସ ଭୁଲିଗଲି ପ୍ରଭୁ ଭୁଲିଗଲି ଭୁଲିଗଲି । ୪ ।
ତବ ନାମ ରସ ଶ୍ରୀ ସୁଧା ପୀୟୁଷ
ନେଇ ବଞ୍ଚିବାକୁ ଦିନ,
କାଳେ ବଶ ହୋଇ ଆହେ ଭାବଗ୍ରାହୀ
ସ୍ମୃତି ମୋର ହାରି ଦେଲି . . . .
ମୁଁ ମୁଢ଼ ଅଜ୍ଞାନୀ ହେଲି ପ୍ରଭୁ ଭୁଲିଗଲି ଭୁଲିଗଲି । ୫
କେଡେ ସ୍ଵାର୍ଥୀ ମୁହିଁ ମୋହେ ଅନ୍ଧ ହୋଇ
ମତ୍ତ ଗର୍ବେ ଅନ୍ଧ ହେଲି,
ଦିଅ ତୁମ୍ଭ ନାମ ହେ କରୁଣା ପ୍ରେମ
ନାମଗାଇ ଯିବି ଚାଳି. . .
ରାଧା ରାଧା କୃଷ୍ଣ ବୋଲି ପ୍ରଭୁ ଭୁଲିଗଲି ଭୁଲିଗଲି । ୬।