💝ମୁଁ ଅବା କେମିତି..💝

ପିଲାବେଳେ ତମେ   ଭଲ ପାଉଥିଲ

      ଜାଣି ମୁଁ ନଥିଲି ତାହା

ଆଜି ସେହି କଥା   ପଡେ ଯେବେ ମନେ

      ଉଡି ଯାଏ  ମୋର ରାହା

ସେଥି ପାଇଁ ବୋଧେ  ଲୁଚି ଛପି ଆସୁ

      ମୋ ସାଥିରେ ଖେଳିବାକୁ

ରାଗ ହିଂସା ମାନ   ନ ଥାଏ ତୋଠାରେ

      ହସି ହସାଉ ମନକୁ 

ହାତ ଧରି ଟାଣି   ନେଉ ଗଛ ମୂଳେ

       ତୋଳି ଦେବା ପାଇଁ ଫୁଲ

କେତେବେଳେ କହୁ   ଆମ୍ବ ତୋଳିବାକୁ

      ଯିବା ଆମ୍ବ ତୋଟା ଚାଲ

ନଦୀପଠା ସେଇ  ଅରମା ବଣୀକୁ

      ଖରାବେଳଟାରେ ଡାକୁ

ବଇଁଚ କୋଳିରେ  ମନ ଥାଏ ବୋଲି

     ତୋଳି ଦିଏ ଖାଇବାକୁ 

ପ୍ରଜାପତି ପରି    ମୋ ହାତକୁ ଧରି

     ଘୂରିବୁଲୁ ନଈଧାରେ

କେହି ଯଦି ଦେଖି   କହିଦିଏ ଘରେ

     କାନ୍ଦୁଥିଲୁ ମିଛଟାରେ

ବହୁ ଚୋରି ଖେଳ   ମୋ ସାଥିରେ ଖେଳୁ 

       ଖେଳୁଥିଲୁ ଲୁଚକାଳି

କଣ୍ଢେଇକୁ ଧରି  ବାହାଘର କରୁ 

       ମିଛେ ଦେଇ ହୁଳହୁଳି

ଆଜି ଯେବେ ତୋର ସବାରି ଉଠିଲା

      ସାହାନାଇ ସ୍ବର ତାଳେ

ଅଭିମାନ ଭରା  ତୋ ସେ ଦୁଇ ଆଖି

      ଭରିଥିଲା ଅଶ୍ରୁଜଳେ

ଥରୁଟେ କେବେ ତୁ  ଖୋଲି କହି ନାହୁଁ 

      ପାଉଥିଲୁ ମୋତେ ଭଲ

ମୁଁ ଅବା କେମିତି  ଦେବଦାସ ହୋଇ 

      ବୁଝିଥାନ୍ତି ତୋର ମୂଲ

ପ୍ରେମ ତ ଶାଶ୍ବତ   ପ୍ରେମ ଚିରନ୍ତନ

      ପ୍ରେମ ଯେ ସତ୍ୟ ସୁନ୍ଦର

ହୃଦୟ ଦେଇଛୁ   ମନ ମୋ କିଣିଛୁ

     ହୋଇଗଲୁ ମୋର ପାର