ମୁଁ ଆଉ ମୋର

ମୁଁ ନୁହେଁ ଶରୀର ସେ ବି ନୁହେଁ ମୋର

ସେ ଘର ଅସ୍ଥାୟୀ କ୍ଷଣଭଙ୍ଗୁର

ମିଥ୍ୟା ସ୍ଵ ସ୍ୱାମୀ ସମ୍ବନ୍ଧ ଭାବନା

ହେତୁ ଭ୍ରମେ ହେଲି ନିବୀଡତର l

ଧନଦଉଲତ ପାର୍ଥିବ ସମ୍ପତ୍ତି

ଦାରା ସୁତ କନ୍ୟା ବନ୍ଧୁ ଆବର

ଛାଡ଼ି ଚାଲିଯିବି ଦିନେ ସବୁ ମୁହିଁ

ଶୂନ୍ୟ ହେବ ମୋର ଅଳକାପୁର l

ଯିଏ ମୋ ନିଜର ଅତି ଆପଣାର

ବିଶ୍ୱ ବ୍ରହ୍ମାଣ୍ଡର ଯେ ଅଧୀଶ୍ଵର

ଯାହାଙ୍କ ନିର୍ଦ୍ଦେଶେ ଲଭିଛି ଜନମ

ସ୍ମରଣରେ କିନ୍ତୁ ନାହାଁନ୍ତି ମୋର l

ଭୋଗ ବିଳାସରେ ମଜିରହି ସଦା

ମୋହମାୟାରେ ମୁଁ ଯାଇଛି ବୁଡ଼ି

ସଦବୁଦ୍ଧି ଉଦୟ ହେଉନାହିଁ ମୋର

ଦିନୁଁଦିନ ବେଳ ଯାଉଛି ଗଡ଼ି l

ଯେତେବେଳେ ମାତୃ ଗର୍ଭେ ରହିଥିଲି

କହିଥିଲେ ମୋତେ ପରମେଶ୍ୱର

ଭୁଲିବୁନି ଜମା ମାୟାଜାଲେ ପଡ଼ି

ଜପୁଥିବୁ ମୋତେ ତୁ ନିରନ୍ତର l

ଵିସ୍ମର ହୋଇଲା ଶ୍ରୀଆଜ୍ଞା ମୋହର

ଭୁଲିଗଲି କୁଆଁ କୁଆଁ କାନ୍ଦରେ

ସଂସାର ବନ୍ଧନେ କ୍ରମେ ମୋହବସେ

ପଡ଼ିଗଲି ଛାଏଁ ମାୟା ଜାଲରେ l

କରୁଛି ପ୍ରାର୍ଥନା ପ୍ରଭୁ ପରାତ୍ପର

ହୋଇ ନତମସ୍ତ ତଵ ଚରଣେ

ଏ ଭଵ ସାଗରୁ ରକ୍ଷାକର ମୋତେ

ସିଞ୍ଚି ଆଶାବାରି ବିଦଗ୍ଧ ପ୍ରାଣେ l