ମୁହଁରେ ବାନ୍ଧିଛି ତୁଣ୍ଡି

ଏକ ଘନ କଳା ଆସ୍ତରଣେ 

ଘେରା ଏଇ କ୍ଷଣଦା

ହଠାତ୍ ନିରୀହ ଜୀବନ ଟା କ୍ଷଣାୟୁ

ନ ଜାଣି ବିଳାସପୂର୍ଣ୍ଣ ମନୁଷ୍ୟଙ୍କ ଅଶ୍ରାବ୍ୟ କଥା,

ଏହା ତ କ୍ଲୀବ ର ପରିଚୟ ।

ଉଛୃଖଂଳେ ରକ୍ତର ହୋଲି ......

ଖେଳି ଯାଏ ବିଭୀଷିକା

ଚାପା କଣ୍ଠ ସ୍ଵରରେ ସାଲିସ୍

ମଝିରେ ମଝିରେ ବାଜି ଉଠେ ପାଉଁଜି

କଙ୍କଣ କ୍ୱଣ ।

ପକ୍ଷୀଟି ଛଟପଟ କୁଲାୟରେ

ଉତ୍ପୀଡକ ସମ୍ମୁଖରେ ଅଗ୍ନିପରୀକ୍ଷା .......

ନିରାଶ୍ରୟେ ସ୍ଥାଣୁ

ଅବି, ମୁହିର କି ଜାଣେ ଦୟା ନା କ୍ଷମା

ଆଖି ଆଗରେ କଷା ମାଂସର ପିଆଲା ,

ଯୁଥ ଯୁଥ କାମୁକ ଶକ୍ତି

ଯୂପ ନିର୍ମାଣରେ ନିମଗ୍ନ

ତୃଷିତ ମନର ଶାନ୍ତି ପାଇଁ ଯୂଷର ପ୍ରସ୍ତୁତି ।

ଆଖି ଆଗରେ ଝରା ଶେଫାଳୀ ସୁପାତି

ମୁକ୍ତ ଗଗନ ତଳେ ଖଣ୍ଡ ଖଣ୍ଡ ବଉଦ ଉହାଡୁ

ଚାନ୍ଦିନୀର କି ଅପୂର୍ବ ଦୃଶ୍ୟ ।

"ଏଇ ଆମରି ପରିବେଶ

ଏଇ ଆମର ସଂସ୍କାର

ଏଇଠି ଖେଳୁ ରକ୍ତର ହୋଲି

କରି ପାରୁନୁ ତିରସ୍କାର" ।