ମର୍ଯ୍ୟାଦା ପୁରୁଷୋତ୍ତମ
ମର୍ଯ୍ୟାଦା ପୁରୁଷୋତ୍ତମ
ଧରମର ହାନି ହୋଇଲା ଧରାରେ
ସାଧୁଙ୍କ ରକ୍ଷଣ ଅର୍ଥେ ।
ଦୁଷ୍କୃତ ନିବାରି ଧର୍ମ ରକ୍ଷାକାରୀ
ରାମ ଜନ୍ମିଲେ ଜଗତେ ।୧।
ସୂର୍ଯ୍ୟବଂଶୀ ରାଜା ଦଶରଥଙ୍କର
ଜ୍ୟେଷ୍ଠ ସୁତ ହେଲେ ରାମ ।
ଶ୍ରୀରାମଚନ୍ଦ୍ର ନାମ ସେ ବୋଲାଇଲେ
ମର୍ଯ୍ୟାଦା ପୁରୁଷୋତ୍ତମ ।୨।
କୌଶଲ୍ୟା ମାତାଙ୍କ ଗରଭୁ ଜନ୍ମିଲେ
ପୁରୁଷୋତ୍ତମ ଶ୍ରୀରାମ ।
ମାତା ପିତାଙ୍କର ପୟର ପୂଜନ୍ତି
ପ୍ରଭାତରୁ ରଘୁତ୍ତମ ।୩।
ବିମାତା କୈକେୟୀ ମନ୍ଥରା ବୁଦ୍ଧିରେ
ବନେ ପେଶିଲେ ଶ୍ରୀରାମ ।
ତେବେ ବି କୈକେୟୀ ମାତାଙ୍କୁ ନିଊନ
ନମଣିଲେ ରଘୁରାମ ।୪।
ବିମାତା ସୁମିତ୍ରା ହୁଅନ୍ତି ଅର୍ଚ୍ଚିତା
ଶ୍ରୀପୁରୁଷୋତ୍ତମଙ୍କର ।
ଭ୍ରାତୃ ସେନେହରେ ବାନ୍ଧିଲେ ଶ୍ରୀରାମ
ଅନୁଜଗଣେ ଶ୍ରଦ୍ଧାର ।୫।
ଗୁରୁ ବିଶ୍ଵାମିତ୍ର ବଶିଷ୍ଠ ଋଷିଙ୍କ
ବଚନ ପାଳନ କରି ।
ରଘୁକୁଳ ରୀତି ପାଳନ କରିଲେ
ସତ୍ଯ ଧରମ ଆଚରି ।୬।
ରାକ୍ଷସ ରାକ୍ଷସୀ କେତେ ବଧ କଲେ
ୠଷି ମୁନି ହିତ ପାଇଁ ।
ପରାକ୍ରମୀ ବୀର ବୀରତ୍ବେ ଭାଙ୍ଗିଲେ
ଶିବଧନୁ ଚାପ ଦେଇ ।୭।
ବାହା ହୋଇ ସୀତା ଜନକ ଦୁହିତା
ପରଶୁରାମଙ୍କ ଦର୍ପ ।
କରିଲେ ଦଳନ ଦେଖିଲା ଜଗତ
ତପ ଆଚରିଲେ କଳ୍ପ ।୮।
ସତ୍ୟ ଦୟା କ୍ଷମା କୋମଳତା ଧୈର୍ଯ୍ୟ
ଶୌର୍ଯ୍ୟ ବୀର୍ଯ୍ୟ ଗାମ୍ଭୀର୍ଯ୍ୟତା ।
ଅସ୍ତ୍ରଶସ୍ତ୍ର ଜ୍ଞାନ ପରାକ୍ରମ ଶାନ୍ତ
ନିର୍ଭୀକତା ସହିଷ୍ଣୁତା ୲୯।
ବିଷୟ ନିବୃତ୍ତି ଆତ୍ମ ବିନିଗ୍ରହ
ନିଷ୍କାମ ଭାବ ସଂଯମ ।
ନୀତି ନୈପୁଣ୍ୟ ତେଜ ତ୍ଯାଗ ମର୍ଯ୍ୟାଦା
ପାଳନ ପୌରୁଷ ପ୍ରେମ ।୧୦।
ଏକପତ୍ନୀବ୍ରତ ମାତୃପିତୃଭକ୍ତ
ଗୁରୁଭକ୍ତ ଭ୍ରାତୃପ୍ରେମ ।
ମୈତ୍ରୀ ଶରଣରକ୍ଷଣ ସରଳତା
ଶିଷ୍ଟ ପ୍ରତିଜ୍ଞା ପାଳନ ।୧୧।
ଦୁଷ୍ଟଦଳନ ବଇରୀଭାବଶୂନ୍ୟ
ପ୍ରଜାନୁୁରଞ୍ଜକ ବୀର ।
ନିଷ୍ଠୁରଭାବବିହୀନ ବହୁଦର୍ଶୀ
ଧର୍ମଜ୍ଞ ଧର୍ମସ୍ଥବିର ।୧୨।
ପବିତ୍ରତା ଆଦି ସକଳ ସଦ୍ଗୁଣ
ମର୍ଯ୍ୟାଦାବନ୍ତ ଶ୍ରୀରାମ ।
ପିତୃସତ୍ୟ ପାଳି ବନଯାତ୍ରା କରି
ବନକୁ କଲେ ଆଶ୍ରମ ।୧୩।
ରାବଣ ହରିଲା ବୈଦେହୀଙ୍କୁ
ରାମ ଜଟାୟୁଙ୍କ ପ୍ରେତକୃତ୍ୟ ।
ସମାପନ କରି ସୁଗ୍ରୀବଙ୍କ ସହ
ସମ୍ଭାଷଣେ ସାଜି ମିତ୍ର ।୧୪।
ବଧିଲେ ବାଳିକି ତରି ଜଳଧିକି
ବିଭୀଷଣ ମିତ୍ର ହୋଇ ।
ଭଲ୍ଲୁକ ବାନର ସେନା ସହ ମିଶି
ରାବଣ ମାରିଲେ ଯାଇ ।୧୫।
ବିଭୀଷଣେ ରାଜା କରାଇ ଲଙ୍କାରେ
ଫେରିଲେ ଅଯୋଧ୍ୟା ପୁର ।
ଦୂତ ହନୁମାନ ଭଲ୍ଲୁକ ବାନର
ସୀତା ଲକ୍ଷ୍ମଣ ସଙ୍ଗର ।୧୬।
ଭରତ ମିଳନ ପରଜା ପାଳନ
ବ୍ରତୀ ହୋଇଲେ ଶ୍ରୀରାମ ।
ରାମ ରାଇଜକୁ ଝୁରୁଛନ୍ତି ଲୋକେ
ପୁରୁଷୋତ୍ତମ ଶ୍ରୀରାମ ।୧୭ ।
ରାମ ରାମ ରଟ ରସନା ମୋହର
ରୋମେ ରୋମେ ମୋର ରାମ ।
ପାପ ତାପ ହାରୀ କରିବେ ଉଦ୍ଧାର
ମର୍ଯ୍ୟାଦା ପୁରୁଷୋତ୍ତମ ।୧୮।