Library
ମର୍ଯ୍ୟାଦା ପୁରୁଷୋତ୍ତମ
ମର୍ଯ୍ୟାଦା ପୁରୁଷୋତ୍ତମ
ରଘୁବଂଶ ଅବତଂଶ ରାମଚନ୍ଦ୍ର
ମର୍ଯ୍ୟାଦା ପୁରୁଷୋତ୍ତମ
ଈକ୍ଷ୍ୱାକୁ କୁଳର ମଉଡମଣି ସେ
ବିଭୁ ପ୍ରଭୁ ରଘୁତ୍ତମ ।
ସୂର୍ଯ୍ୟବଂଶୀ ରାଜା ଦଶରଥଙ୍କର
ଜ୍ୟେଷ୍ଠ ତନୟ ବୋଲାନ୍ତି
ସ୍ବୟଂ ଭଗବାନ ନେଲେ ଅବତାର
ଦୁର୍ବାଦଳ ତନୁ କାନ୍ତି ।
ପ୍ରଭାତରୁ ଉଠି ମାତା ପିତା ପଦେ
ନୁଆଁନ୍ତି ନିଜର ମଥା
ସଭିଙ୍କୁ ଆନନ୍ଦ ଦେଇ ରଘୁନାଥ
ହୋଇଲେ ଜଗତଜିତା ।
ବିଶ୍ଵାମିତ୍ର ମୁନି ଯଜ୍ଞରକ୍ଷା ପାଇଁ
ନେଲେ ରାମ ଲକ୍ଷ୍ମଣଙ୍କୁ
ଧନୁର୍ବିଦ୍ୟା ଦେଲେ ଉଭୟେ ବଧିଲେ
ତାଡକା ଓ ସୁବାହୁଙ୍କୁ ।
ରାକ୍ଷସଙ୍କୁ ବଧି ଯଜ୍ଞ ରକ୍ଷା କଲେ
ସୀତା ସ୍ୱୟମ୍ବରେ ଗୁରୁ
ଚଳିଲେ ରାମ ଲକ୍ଷ୍ମଣେ ସଙ୍ଗେ ନେଲେ
ଜନକ ନିମନ୍ତ୍ରଣରୁ ।
ପୟର ଚାପନ୍ତି ବେନି ଭାଇ ରହି
ଗୁରୁ ବିଶ୍ଵାମିତ୍ରଙ୍କର
ମର୍ଯ୍ୟାଦା ପୁରୁଷୋତ୍ତମ ରାମ
ଧନୁ ଭାଙ୍ଗିଲେ ଧୂର୍ଜଟୀଙ୍କର ।
ସୀତା ବିଭା ହୋଇ ଫେରିବା ବାଟରେ
ପରଶୁରାମଙ୍କୁ ଜିଣି
ଆସିଲେ ଅଯୋଧ୍ୟା ପ୍ରଭୁ ରଘୁତ୍ତମ
ସୁଖେ ଦିନ ଗଲା ପୁଣି ।
ପ୍ରାଣ ଯିବ ପଛେ ବଚନ ନ ଯିବ
ଏ ତ ରଘୁକୁଳ ରୀତି
ପିତୃ ସତ୍ଯ ପାଳି ବନବାସୀ ରାମ
ସଙ୍ଗେ ନେଲେ ସୀତା ସତୀ।
ଲକ୍ଷ୍ମଣଙ୍କ ସହ ଚଉଦ ବରଷ
ବନବାସୀ ହେଲେ ରାମ
ସ୍ବର୍ଗବାସୀ ହେଲେ ପିତା ଦଶରଥ
ଶୁଣି କଲେ କ୍ରିୟା କର୍ମ ।
ଦଣ୍ଡକାରଣ୍ୟରେ କରିଲେ ନିବାସ
ମାରିଲେ ସୁନାହରିଣ
ଛଳରେ ରାବଣ ଧରି ଯତି ରୂପ
କରିଲା ସୀତା ହରଣ।
ମର୍ଯ୍ୟାଦା ପୁରୁଷୋତ୍ତମ ରାମଚନ୍ଦ୍ର
ସୀତା ହରଣ ପୂର୍ବରୁ
ପ୍ରିିୟପତି ସୁଖ ଦେଇ ତୋଷୁଥିଲେ
ଜଣା ତା ରାମାୟଣରୁ ।
ଜଟାୟୁଙ୍କ ମୁଖେ ଅଗ୍ନି ଦାନ କରି
ସମ୍ପାଦିଲେ ପୁତ୍ର କର୍ମ
ପ୍ରଭୁ ରାମଚନ୍ଦ୍ର ପୁରୁଷ ଉତ୍ତମ
ଲୋକାଭିରାମ ଶ୍ରୀରାମ ।
ସୁଗ୍ରୀବଙ୍କ ସହ ମିତ୍ରତା ସ୍ଥାପିଲେ
ମିତ୍ର ପାଇଁ ବାଳି ବଧ
ବିଭୀଷଣେ ଦେଲେ ଶରଣ ଶ୍ରୀରାମ
ଚିନ୍ତିଲେ ରାବଣ ବଧ ।
ସମୁଦ୍ର ତରିଲେ ରାବଣ ମାରିଲେ
ବିଭୀଷଣେ ଲଙ୍କା ରାଜା
କରାଇ ସୀତାଙ୍କୁ ଅଗ୍ନି ପରୀକ୍ଷିତେ
ହେଲେ ଅଯୋଧ୍ୟାର ରାଜା ।
ଭରତଙ୍କୁ ସ୍ନେହ ଶରଧା ଦେଇ ସେ
ପାଦୁକାକୁ ଥିଲେ ଦେଇ
ଲକ୍ଷ୍ମଣଙ୍କୁ ଯେତେ ସ୍ନେହ କରୁଥିଲେ
ପୁରାଣେ ତା ଅଛି ରହି ।
ରାମ ହେଲେ ରଜା ପାଳିଲେ ପରଜା
ମଣି ନିଜର ସନ୍ତାନ
ପରଜା ରଞ୍ଜନ ବ୍ରତେ ହୋଇ ବ୍ରତୀ
ତେଜିଲେ ସୀତାଙ୍କୁ ବନ ।
ମର୍ଯ୍ୟାଦା ପୁରୁଷୋତ୍ତମ ରାମଚନ୍ଦ୍ର
ପ୍ରଭୁ ଆଦର୍ଶ ସନ୍ତାନ
ଆଦର୍ଶ ଭ୍ରାତା ଆଦର୍ଶ ଜାମାତା ସେ
ଆଦର୍ଶ ବନ୍ଧୁ ସେ ଜାଣ ।
ଆଦର୍ଶ ରାଜନ ଧର ରାମ ନାମ
ଏ ଭବରୁ ହେବ ପାର
କହେ ନିରଞ୍ଜନ ମୁଁ ମୂଢ ଅଜ୍ଞାନ
ରାମ ମୋ ଜୀବନାଧାର ।
