ମୃତ୍ୟୁର କୋଳରେ

ମୃତ୍ୟୁର କୋଳରେ    ମହାନଦୀ ନୀରେ

       ଭାସୁ ଛନ୍ତି ତିନି ଶିଶୁ

ବାପା ଚାଲିଗଲା     କରୋନା ଖାଇଲା

      ମାଆ ଗଲା ଖାସୁ ଖାସୁ

    ହାଡ଼େଇ, ଆଈ ନ ପାରଇ ଚାଲି

ସମ୍ଭାଳିବା ପାଇଁ,ଘରେ କେହି ନାହିଁ, ବୁଢୀ ମରୁଥାଇ ଭଳି ।

ପାଣି ପାଇଁ ଗଲା      ପାହାଚୁ ଖସିଲା

      ବୁଢ଼ୀ ପ୍ରାଣ ଗଲା ଚାଲି

ହାଇରେ ଦଇବ       ଏକି କଲୁ ଭାବ

      ଶିଶୁ କାନ୍ଦିଲେ ବୋବାଳି

     ସହଜେ,ଆଦିବାସୀ ଘର ଛୁଆ 

ଆଜିର ଯୁଗରେ,ଯେ ଯାହା ସ୍ୱାର୍ଥରେ,କିଏବା କରୁଛି ଆହା ।

ଜଗତ ଜନନୀ       ଦେଲେ କୃପା କିଣି

       କିଛି ହାତ ବଢ଼େଇଲେ

ଦଶ ବର୍ଷ ଛୁଆ      କୁନି ବାପା ମାଆ

       ଲାଳନ ପାଳନ କଲେ

     ଶକତି,ଦେଲେ ଜଗତର ମାତା

କୁନି କୁନି ଦୁଇ,ଛୁଆଙ୍କୁ ଖୁଆଇ,ନିଜ ପ୍ରତି ନାହିଁ ଚିନ୍ତା ।

ହାଇରେ ସେନେହ      ମମତାର କୋହ 

       କନ୍ଦାଇବ କେତେ ଦିନ

କିପରି ବଞ୍ଚିବେ        ନିସହାୟ ସର୍ବେ

       କିଏ ନିତି ଦେବ ଅନ୍ନ

    ମିଡ଼ିଆ,ଜଣାଇଲେ ସରକାରେ 

ଆଶା କ୍ଷୁଧା କାରୀ, ପଡିବାକି ଝରି,ସେହି ଏକା କହିପାରେ ।।