ମୃତସ୍ଵପ୍ନ

ମିଛ ପ୍ରତିଶ୍ରୁତିର ଭାର ବୋହି ବୋହି

ମରି ଯାଇଥିବା

ମୋ ସକଳ ଭାବନା

ଆଜି ହଠାତ୍ ମୃତ୍ୟୁଞ୍ଜୟ ସାଜି

କୋହାହଳ କରୁଛନ୍ତି

ଶ୍ରାବଣର ପହିଲି ବର୍ଷା ଛିଟାରେ 

ଭିଜି ଭିଜି

ପୁଣି ଥରେ ଅଙ୍କୁରୋଦ୍ଗମ ଘଟିଛି

ମୋ ଭିତରେ କାହିଁ କେଉଁଠି 

ହଜି ଯାଇଥିବା

ମୃତ ସମ୍ଭାବନାଗୁଡ଼ିକର

ବୋଧହୁଏ ନିତି ନିତି ମରି ମରି

ସେମାନେ ବି ଏବେ

ବିରକ୍ତବୋଧ କଲେଣି

ତାଙ୍କ ଭିତରେ ନାହିଁ ଆଉ

ବଞ୍ଚିରହିବାର ଦୁର୍ବାର ଲାଳସା

ଅଥବା ମୃତ୍ୟୁର ଚରମ ଭୟ

ସେଥିପାଇଁ 

ବିପ୍ଳବୀ ହୋଇଉଠିଛନ୍ତି 

ସକଳ ଭାବନା

ଭୟର ଚିହ୍ନ ବି ନାହିଁ ମନରେ

ଯେଉଁ ଭାବନାସବୁ

ତୁମ କ୍ରୁର କରସ୍ପର୍ଶେ କାତର ହୋଇ

କଳଙ୍କ କାଳିମାକୁ ସହି ନ ପାରି

ମୃତ୍ୟୁକୁ ଆବୋରି ନେଇଥିଲେ 

ଥରେ ମୃତ୍ୟୁକୁ ଆଲିଙ୍ଗନ କରି

ଫେରିବା ପରେ

ସେମାନେ ପାଇଛନ୍ତି ଏକ ନବ ଜୀବନ

ଥରେ ମୃତ୍ୟୁକୁ ଦୃଢ ଭାବେ

ଆପଣାର କରିବା ପରେ

ଆଉ ଭୟ କ'ଣ ଯେ

ଜୀବନର ସବୁ ଆଶା ଆକାଂକ୍ଷାର

ଗୋଳାପୀ କବରକୁ

ନିଜ ହାତରେ ସଜାଇବା ପରେ

ପଛକୁ ଫେରିବାର ବାଟ ତ ନ ଥାଏ 

ଏବେ କେବଳ ଆଗକୁ ବଢିବାର ବେଳ 

ନିଜେ ନିଜ ପାଇଁ ଲଢିବାର ବେଳ

ହାରିବାକୁ ତ କିଛି ପାଖରେ ନାହିଁ 

ମୃତ୍ୟୁକୁ ବି ବରଣ କରି ନେଇଥିବା

ଭାବନାସବୁ ପାଇଁ 

ଏବେ କେବଳ ଜିତିବାର ବେଳ

ମୃତ ସ୍ଵପ୍ନ ସବୁ 

ଆଉ କେତେ ବା ମରିବେ

ଏବେ ମୃତ୍ୟୁଞ୍ଜୟ ସାଜି 

ସ୍ଵପ୍ନ ଦେଖିବାର ବେଳ