ମୃତ ଆତ୍ମା

 

ବିଶ୍ବାସଘାତକତାର ତରବାରୀ

ହୃଦୟକୁ ମୋର ଚିରିଦେଇ

କରିଅଛି ରକ୍ତାକ୍ତ ।

ସବୁକିଛି ମଥାପାତି ସହିଯାଇଛି ମୁଁ

ଯେମିତି ସହିଥାଏ

ରାସ୍ତାକଡର ପଥରଟେ

ପଥିକର ପଦାଘାତ ।

ମନର ସବୁ ଆଶା 

ଆଉ ଆଖିର ସବୁ ସ୍ବପ୍ନ ସରିଯାଇଅଛି ।

ତଥାପି ଯେହେତୁ 

ହୃଦୟର ସ୍ପନ୍ଦନ ବନ୍ଦ ହୋଇନାହିଁ,

ମୁଁ ଏ ଯାଏଁ ବଞ୍ଚିଛି ।

ଆଜି ମୁଁ ଏମିତି ଏକ ମରୁଭୂମି,

ନା ମୋ ପାଖରେ ଅଛି ଜଳାଶୟ,

ନା ଅଛି ମରୀଚିକାର ଭ୍ରମ ।

କେବଳ ଏକ ଶୂନ୍ୟତାକୁ ନେଇ 

ବଞ୍ଚିଅଛି 'ମୁଁ'

'ମୁଁ' ଅର୍ଥ କେବଳ ମୋ ଶରୀର ।

ଶାସ୍ତ୍ର କହେ 

" ଶରୀର ମରେ, ଆତ୍ମା ଅମର"

କିନ୍ତୁ ମୁଁ ଦେଖିଅଛି ବିପରୀତ ।

ଶରୀର ବଞ୍ଚିଛି

ଆଉ ଆତ୍ମା ମୋର

ଅନେକ ଦିନରୁ ମରିଯାଇଅଛି ।