ମୋବାଇଲ

ଚଉଦ ବ୍ରହ୍ମାଣ୍ଡ    

ହାତେ କରି ରୁଣ୍ଡ

    ଗଢି ଦେଲେ ଯନ୍ତ୍ର ଟିଏ

ସୃଷ୍ଟି ରେ ବିଜ୍ଞାନ

ଶ୍ରେଷ୍ଠ ଅବଦାନ

     ମୋବାଇଲ ନାମେ ସିଏ ।

ଦେଖାଇଲେ କୃଷ୍ଣ

ଏ ବିଶ୍ୱ  ବ୍ରହ୍ମାଣ୍ଡ

     ମାତା ଓ ସଖା ଅର୍ଜୁନେ

ବିଜ୍ଞାନ  ଦେଖାଏ

ମୋବାଇଲ ମଧ୍ୟେ

      ବିଶ୍ଵରୂପ ସର୍ବ ଜନେ ।

ଯାହା ତ ଖୋଜିବ

ତାହା ତ  ପାଇବ

      ସବୁ କଥା ତାକୁ ଜଣା

ଅଜ୍ଞାନୀକୁ ଜ୍ଞାନ

ଦୁଷ୍ଟକୁ ଗୋପନ

     ବିଦ୍ୟା ଦେଇ କରେ ବଣା ।

ପଥ ଭ୍ରଷ୍ଟେ ପଥ

ଦେଖାଏ ଏହା ତ

      ପୁରାଣ ଠାରୁ ବିଜ୍ଞାନ

ସାରା ପୃଥିବୀକୁ

ସଂକୁଚିତ କରି

      ଉଦରେ ରଖିଛି ଜାଣ ।

ଏନ୍ତୁଡ଼ି  ଶାଳରୁ

ଛୁଆ ଧରେ ତାକୁ

      ନୋହିଲେ ଉଠେ ବିଳପି

ଶିକ୍ଷା ଦାନ ଠାରୁ

ପ୍ରେମ ପାଠ ଯାଏ 

      ଧୁରନ୍ଧର ଯୁଗ ବ୍ୟାପି ।

ପିଲା ଠାରୁ ବୁଢ଼ା

ପାଗଳ  ପରାଏ

     ମୋବାଇଲ ପଛେ ପଡ଼ି

ଯେତିକି ସେ ହିତ

ପୁଣି ସେ  ଅହିତ

     ସବୁ ଗୁଣ ଥାଏ ଜଡ଼ି ।

ଛାଡି ପାଠ ପଢା

ପିଲା ହେଲେ ବଣା

     ଅନଲାଇନ୍ ଖେଳେ ମାତି

ଉପରକୁ  ନୁହଁ

ଯୁବ ଯୁବା ମୁହଁ

     ବସୁଥାନ୍ତି ମୁହଁ ପୋତି ।

ବସି ସଦା ଘରେ

ଏହି ଯନ୍ତ୍ର ଦ୍ୱାରେ

     ହୁଏ ସବୁ ଫଇସଲା

କୋଢ଼ିଆଠୁଁ ବଳି

କୋଢିଆ ହୁଅନ୍ତି

     ଝାଳ ବୁହେନିଟି ପରା ।

ପାକୃତିକ ପନ୍ଥା 

କଷ୍ଟ ସାଧ୍ୟ ପନ୍ଥା

      ନିରୋଗ ଜୀବନ ଥିଲା

ଆଧୁନିକ ପନ୍ଥା

ସହଜର ପନ୍ଥା

     ରୋଗ ଭୋଗି ଦିନ ଗଲା ।

ଆସିବ ସେ ଦିନ

ହେବ ହୀନିମାନ

     ଅବୁଝା ମଣିଷ ଜାତି

ନେଡି ଗୁଡ ଭାଇ

କହୁଣିରେ ଥାଇ

     ଆଉ ନ ପାରିବା ଚାଟି ।