ଶରଶଯ୍ୟାଶାୟୀ ଭୀଷ୍ମଙ୍କ ସ୍ତବ

ନମଃ ଶ୍ରୀପୁରୁଷୋତ୍ତମ ଦେବକୀନନ୍ଦନ l

ପ୍ରାଣୀଙ୍କର ଗତି ମୁକ୍ତି ସଂସାର କାରଣ ll

ଅଷ୍ଟ ବସୁଙ୍କର ମଧ୍ୟେ ଘୋର ଶାପ ପାଇ l

ଜନମ ଲଭିଲି ମର୍ତ୍ତ୍ୟେ ନର ଦେହ ବହି ll

ଶାନ୍ତନୁ ନନ୍ଦନ ମୁହିଁ ଗଙ୍ଗା ଦେବୀ ପୁତ୍ର l

ଦେବବ୍ରତ ଭୀଷ୍ମ ଶରଶଯ୍ୟାରେ ଶାୟିତ ll

କଣ୍ଟକିତ ଶଯ୍ୟା ପରେ କଣ୍ଠାଗ୍ରତ ପ୍ରାଣ l

ଏ ମର୍ତ୍ତ୍ୟ ଛାଡ଼ିବି ଚାହିଁ ଉତ୍ତର ଅୟନ ll

ପ୍ରାର୍ଥନା ଏତିକି ପ୍ରଭୋ କଳାକର ମୁଖ l

ଦର୍ଶନେ ତଵ ଖଣ୍ଡଇ କୋଟି ଜନ୍ମ ଦୁଃଖ ll

ଦର୍ଶନ ଦିଅ ହେ ପ୍ରଭୁ ଭୁବନ ମୋହନ l

ମୃତ୍ୟୁଲୋକ ନ ଆସିବି ଆଉ କଦାଚନ ll

ପଦ ତଳେ ଆଶ୍ରା ଦେବ ପ୍ରଭୁ ଚକ୍ରଧର l

ମୋକ୍ଷ ଲଭି ପୁନର୍ଜନ୍ମ ନୋହିବ ମୋହର ll

ତୋର ଆଜ୍ଞା ପାଇ ଧର୍ମରାଜ ଯୁଧିଷ୍ଠିରେ l

ବୁଝାଇ କହିଲି ଧର୍ମନୀତି ସଂକ୍ଷେପରେ ll

ଦିବ୍ୟ ଦୃଷ୍ଟି ପ୍ରଦାନିଲେ ଶ୍ରୀମନ୍ନାରାୟଣ l

ଗାଙ୍ଗେୟଙ୍କୁ ଦେଲେ ବିଶ୍ୱ ରୂପ ଦରଶନ ll

ଭକତ ବତ୍ସଳ ପ୍ରଭୁ ଜୟ ଶ୍ରୀ ଶ୍ରୀକୃଷ୍ଣ l

ହୃଦୟ ପବିତ୍ରେ ଭୀଷ୍ମ ନୟନ ସତୃଷ୍ଣ ll

ଭକତ ମନ ଜାଣିଲେ ଭକ୍ତ ଭାବଗ୍ରାହୀ l

ପ୍ରୟାଣ ଲଭିଲେ ଭୀଷ୍ମ ହରି ହରି କହି ll