ନୂତନ ଆରମ୍ଭ, ନୂତନ ତୁମେ

ନୂତନ ଆରମ୍ଭ କେଡେ ସୁମଧୁର

ମଧୁର ସ୍ମୃତି ତାହାର ।

ନୂତନ ଦୁନିଆ ନୂତନ ଲାଗଇ

ନୂତନର ବ୍ୟବହାର ।

ନୂତନ ସମ୍ପର୍କ ସ୍ଥାପନ ହୋଇଲେ

ବଢିଥାଏ ଅନୁରାଗ ।

ନୂତନ ନୂତନ ବାର୍ତ୍ତାଳାପ ହୁଏ

ଦିନୁ ଦିନ ବଢେ ରାଗ ।

ନୂତନ ଜୀବନ ଆରମ୍ଭ ହୁଅଇ

ଲାଗେ ସବୁ ନୂଆ ନୂଆ ।

ନୂତନ ଭାବର ଆଦାନପ୍ରଦାନ

ହୁଅଇ ଜାଣେ ଦୁନିଆ ।

ନବ ଉଦ୍ଦୀପନା ନବ ଉନ୍ମାଦନା

ଜନ୍ମ ନିଏ କାଳବଳେ ।

ନୂତନ ଆଶାର ହୁଅଇ ସଞ୍ଚାର

ମନ ଅଗଣାର ତଳେ ।

ନୂତନତ୍ବ ଆସି ଆଗେ ଉଭା ହୁଏ

ନୂତନ ବନ୍ଧୁତା ହୁଏ ।

ନୂତନ ପ୍ରୟାସ ନୂତନ ରୂପରେ

ନୂତନତ୍ବ ଖୋଜୁଥାଏ ।

ନୂତନ ତ ତୁମେ ନୂତନ ତ ମୁଁ

ନଥିଲା ତ ଜଣାଶୁଣା ।

ନୂତନ ଆରମ୍ଭ ହେଉଅଛି ଏବେ

ନହେବା ଆମେ ଅଜଣା ।

ତୁମକୁ ଦେଖୁଛି ନୂତନ ମୁଁ ଆଜି

ତୁମେ କି ଦେଖୁଛ କୁହ ?

ସ୍ବାଗତ କରିବା ନୂତନକୁ ଆମେ

ଅବିଶ୍ରାନ୍ତ ଅହରହ  ।

ନୂତନ ଆରମ୍ଭ ତୁମ ସହ ହେବ

ଏକଥା କି ଭାବିଥିଲ ?

ତୁମକୁ ନୂତନ ପାଇ ମୁଁ ମଣୁଛି

ଏ ସୃଷ୍ଟି ସବୁଠୁ ଭଲ ।