ମୋ ସ୍ବପ୍ନର ବିଦ୍ୟାଳୟ
ମୋ ସ୍ବପ୍ନର ବିଦ୍ୟାଳୟ
ସତ୍ୟ ଅହିଂସାର ସଙ୍ଗମସ୍ଥଳ
ଦଣ୍ଡାୟମାନ ନିରାପଦ ଶ୍ରେଣୀ କକ୍ଷ, ପ୍ରାଚୀର;
କାନ୍ଥରେ କଳାପଟା, ନୀତିବାଣୀ
ମହାପୁରୁଷଙ୍କ ଫଟୋଚିତ୍ର
ସମତୁଲ ଚଟାଣରେ ଖଡିରେ ଆଙ୍କିବାର ପ୍ରୟାସ
ମୁକ୍ତ ବିଶୁଦ୍ଧ ବାୟୁର ପ୍ରବେଶ ନିମନ୍ତେ
ଥିବ ବଡବଡ ଝରକା ଓ କବାଟ.......
ସେ ମୋ ସ୍ବପ୍ନର ବିଦ୍ୟାଳୟ ।
ବିଶୁଦ୍ଧ ପାନୀୟ ଜଳ ବ୍ୟବସ୍ଥା
ସ୍ବଚ୍ଛ ପରିମଳ ସଙ୍ଗେ ସୁସ୍ଥ ପରିବେଶ
ବେଶ୍ ଆକର୍ଷଣୀୟ, ଅବର୍ଣ୍ଣନୀୟ
ମଧୂପର ମଧୁ ସଂଗ୍ରହ
ନାନା ରଙ୍ଗର କୁସୁମ କଳିକାରୁ;
ଥିବ ପ୍ରଶସ୍ତ ଖେଳପଡିଆ, ପରିବା, ଫଳ ବଗିଚା
ଧାଡି ଧାଡି ରଙ୍ଗ ବେରଙ୍ଗର ଗଛଲତା.....
ସେ ମୋ ସ୍ବପ୍ନର ବିଦ୍ୟାଳୟ ।
ଜାତୀୟ ଦିବସରେ ତ୍ରିରଙ୍ଗା ଫରଫର
ମହାପୁରୁଷଙ୍କ ଜୟନ୍ତୀରେ ଆଲୋଚନା ଚକ୍ର
ଯୋଗ ପ୍ରାଣାୟମର ସଙ୍ଗମସ୍ଥଳ
ସାଂସ୍କୃତିକ ଓ କ୍ରୀଡ଼ା ପାଇଁ ପ୍ରଯ୍ୟାପ୍ତ ସୁଯୋଗ
ମାନସିକ ଓ ଶାରୀରିକ ଦକ୍ଷତାର ପ୍ରମାଣ
ସୃଜନଶୀଳ ଲିଖନ, ବକ୍ତୃତା, ସଂସ୍କୃତି ଓ
କଳା ପ୍ରଦର୍ଶନର ଉପଯୁକ୍ତ ସ୍ଥାନ........
ସେ ମୋ ସ୍ବପ୍ନର ବିଦ୍ୟାଳୟ ।
ଈଶ୍ୱର ଭକ୍ତି ଓ ସମର୍ପଣର ପ୍ରାର୍ଥନା ସଭା
ଦେଶ ବିଦେଶର ଖବର ସାଙ୍ଗକୁ ନୀତିବାଣୀ
ମଧ୍ୟାନ୍ନ ଭୋଜନର ପଞ୍ଚ ନୀୟମର ପାଳନ
ହାତଧୂଆର ଅଭ୍ୟାସ କରଣ
ଏକତା ଓ ଶୃଙ୍ଖଳାରେ ଭୋଜନ ମନ୍ତ୍ର ଆବୃତ୍ତି
ନିଆରା ସେ ଅଭୁଲା ଓ ମନୋରମ ସ୍ମୃତି
ନଳକୂପରେ ଥାଳି ଧୋଇବାରେ
ଥିବ ସେଠି ପ୍ରତିଯୋଗିତା..........
ସେ ମୋ ସ୍ବପ୍ନର ବିଦ୍ୟାଳୟ ।
ଗୁରୁ ଶିଷ୍ୟ ମଧ୍ୟରେ ଅତୁଟ ବିଶ୍ବାସ
ଶ୍ରେଣୀ କକ୍ଷରେ ପଢାଇବାର ନିଶା
ଶିକ୍ଷଣ ଶିକ୍ଷାଦାନରେ ଥିବ ସହଯୋଗ ଓ ସହଭାଗିତା
ପ୍ରଶ୍ନ ଉତ୍ତରରେ କକ୍ଷରେ କୋଳାହଳ
ଭାବପୂର୍ଣ୍ଣ ଭାବବିନିମୟ ମହତ୍ତ୍ୱପୂର୍ଣ୍ଣ
ହେଉଥିବ ବ୍ୟବସ୍ଥିତ ପରୀକ୍ଷା ଓ
ତ୍ରୁଟିଶୂନ୍ୟ ମୂଲ୍ୟାୟନ ..........
ସେ ମୋ ସ୍ବପ୍ନର ବିଦ୍ୟାଳୟ ।
ଗୋଷ୍ଠୀ ଓ ଅଭିଭାବକଙ୍କ ସହ ଉତ୍ତମ
ବୁଝାମଣା ଓ ସହଭାଗିତା
ଦଣ୍ଡମୁକ୍ତ ପରିବେଶ
ନଥିବ ଭୟର ବାତାବରଣ
ନଥିବ ଘୃଣା, କାପୁଣ୍ୟତା, ପକ୍ଷପାତିତା
ଥିବ କେବଳ ଭକ୍ତି, ସମର୍ପଣ, ସ୍ନେହ, ଶ୍ରଦ୍ଧା,
ଭଲପାଇବା, ଧର୍ମନିରପେକ୍ଷତା ସମସ୍ତଙ୍କ ମଧ୍ୟରେ ......
ସେ ମୋ ସ୍ବପ୍ନର ବିଦ୍ୟାଳୟ ।