ତୁଚ୍ଛ ସମ୍ପର୍କ
ତୁଚ୍ଛ ସମ୍ପର୍କ
ମିଛ ମରୀଚିକା
ଛଳନାର ମୁଖା
ସ୍ବାର୍ଥର ସାରଥି ସାଜି
ସମାଜ ମଧ୍ୟରେ
ସମ୍ପର୍କର ସେତୁ
ବାନ୍ଧୁଛି ମଣିଷ ଆଜି ।
ଅର୍ଥର ଲାଳସା
କାମନାର ମୋହେ
ସମ୍ପର୍କ ଯୋଡେ ଯେ ଜନ
ଯୋଡି ହୁଏ ସିନା
ଚିରସ୍ଥାୟୀ ନୁହେଁ
ସେ ସମ୍ପର୍କ ଅତି କ୍ଷୀଣ ।
ସ୍ନେହ ମମତାକୁ
ଜାବୁଡି ଧରିଣ
କରେ ସେବା ସମର୍ପଣ
ପାଇବାର ଆଶା
ନଥାଏ ହୃଦୟେ
ସମ୍ପର୍କ ରହେ ଅକ୍ଷୁଣ୍ଣ ।
ବିପଦେ ଆପଦେ
ଆହା ପଦେ ସିନା
ଖୋଜେ ସହୃଦୟ ଜନ
ସେଥିରୁ ଟିକିଏ
ଉଣା ହୋଇଗଲେ
କରେ ମାନ ଅଭିମାନ ।
ମାନ ଅଭିମାନ
ସମ୍ପର୍କ ଭାଙ୍ଗେନି
କରେ ଯେ ଅତି ନିବିଡ଼
ସମୟ ଚକ୍ରରେ
ସମ୍ପର୍କକୁ ଭାଙ୍ଗି
ପାଲଟିବୁ ଦିନେ ଜଡ ।
ସାଙ୍ଗରେ ତୋହର
କେହି ଯିବେ ନାହିଁ
ପଛରୁ ଆସିବେ ଫେରି
ପଞ୍ଚଭୁତରେ ତୁ
ଲୀନ ହୋଇଗଲେ
ମନରୁ ଦେବେ ପାଶୋରି ।
ମୋର ମୋର କହି
ସମ୍ପର୍କ ଗଢିଲୁ
ବାନ୍ଧି ବିଶ୍ବାସର ଡୋରି
ନିନ୍ଦା ଅପବାଦ
ଯାତନା ସହିଲୁ
ପରକୁ ଆପଣା କରି ।
ନିନ୍ଦୁକ ଯେ ସଦା
ଇର୍ଷାପରାୟଣ
ଭାବନା ମନରେ ରଖି
ସମ୍ପର୍କରେ ସିଏ
ଭଟ୍ଟା ଆଣିଥାଏ
ସହି ପାରେନାହିଁ ଦେଖି ।
ମିଛ ମୋହ ମୟା
ସଂସାର ମଧ୍ୟରେ
ଜଗନ୍ନାଥ ସତ ସିନା
ସବୁ ସମ୍ପର୍କ ଯେ
ତୁଛ ଏ ସଂସାରେ
ତୋ' - ମୋର ସମ୍ପର୍କ ବିନା ।