ମୋ ପିଲାଦିନ ଶୀତ

ଆସିଗଲେ ଶୀତଦିନ

ମନେପଡେ ପିଲାଦିନ

ଧୁନିଲଗା ନିଆଁପୁଆଁ

ଆଉ କେତେ କଥାମାନ ॥

ଆମ ସାଇ ପୂର୍ବ ପଟେ

ଥିଲା ଏକ ଆମ୍ବଗଛ

ସକାଳ ଖରାଟା ସେଠି

ପଡୁଥିଲା ହୋଇ ସ୍ୱଚ୍ଛ ॥

ଆମେ ସବୁ ପିଲାମାନେ

ଖରା ପୁଆଁଇବା ପାଇଁ

ସକାଳୁ ସକାଳୁ ଉଠି

ବସୁଥିଲୁ ସେଠି ଯାଇ ॥

ପାଖ ବାଉଁଶ ବୁଦାରୁ 

ଶୁଖିଲା କରଡି କଣି

ଶୁଖିଲା ଆମ୍ବ ପତର

ଆଣି କରୁଥିଲୁ ଧୁନି ॥

ବାଉଁଶଗଛରୁ ଆମେ 

ଭାଙ୍ଗୁଥିଲୁ ଦାନ୍ତକାଠି

ଦାନ୍ତଘଷି ସାରି ସେଠି

ଖେଳୁଥିଲୁ ଗୁଲିବାଟି ॥

ସକାଳୁ ପଢିବା ପାଇଁ

ନଥିଲା କାହାରି ଚାପ

ଖେଳ ଖରାପୁଆଁ ସାରି

କରୁଥିଲୁ ମଜ୍ଜାଗପ ॥

ନଳୁଆ କେଳାଙ୍କ ଦଳ

ସେହି ଆମ୍ବଗଛ ମୂଳେ

ରହୁଥିଲେ ପ୍ରତିବର୍ଷ

ଆସି ଏହି ଶୀତ କାଳେ ॥

ସେମାନଙ୍କ ବଙ୍କା ତେଢା

କଥା ଶୁଣି ଲାଗେ ମଜ୍ଜା

ତାଙ୍କ ପାଖେ ବସି କଥା

ହେଉଥିଲେ ଆମ ଅଜା ॥

କେଳୁଣୀମାନେ ଯାଆନ୍ତି

ଗାଆଁକୁ ପସରା ନେଇ

ପସରାରେ ମନୋହରି

ଜିନିଷମାନ ସଜେଇ॥

ନଳ ଧରି କେଳାମାନେ

ଯାଆନ୍ତି ଚଢେଇ ମାରି

ଅନ୍ଧାର ହେବା ପୂର୍ବରୁ

ଆସନ୍ତି ସେଠାକୁ ଫେରି ॥

ସଂଜ ଆସିବା ପୂର୍ବରୁ

ଦିନ ଯାଉଥାଏ ଗଡି

ମୁଢି ଆଉ ମୁଆଁ ଧରି

ଆସେ ଗୁଡିଆଣୀ ବୁଢି ॥

ମୁଢି ମୁଆଁ ଖାଇବାକୁ

ବୋଉ ପାଖେ କରୁ ଅଳି

କିଣିଦିଏ ବୋଉ ମୁଢି

ଧାନ କି ବିରି ବଦଳି ॥

ପୁଷ ଆଉ ମାଘ ମାସ

ହେଉଥିଲା ଭାରି ଜାଡ

ବୁଢା ବୁଢୀଙ୍କର କାଳ

ଭାଙ୍ଗିଦେଉଥିଲା ହାଡ ॥

କମ୍ବଳ ଅବା ରେଜେଇ

ନଥିଲା ସବୁରି ଘରେ

କାମ ଚଳି ଯାଉଥିଲା

ମସିଣା ଆଉ ହେଁସରେ ॥

ଆଜି ପରି ସେ କାଳରେ

ନଥିଲା ପାଖରେ ଧନ

ଅଭାବ ଥାଇ ବି ଘରେ

ଖୁସି ରହୁଥିଲା ମନ ॥

ଶୀତ ଦିନ ପ୍ରତିବର୍ଷ

ଆସେ ଯାଏ ଏହିପରି

ହେଲେ ମୋର ପିଲା ଦିନ

ଆସୁନି ତ ଥରେ ଫେରି ॥

****