ମୋ ପାଇଁ ତୁ

ଝରା ମଳୟର ବାସ୍ନାରେ ବିଭୋର,

ମନ ଗହନରେ ପଶି ଆସି

ତୁମେ ମୋତେ କରିଥିଲ

ବିବଶ, ଅଣାୟତ୍ତ ଆଉ ଦୁର୍ବଳ ,

ନିଜ ବକ୍ଷରେ ଜଡାଇ ଧରି

ଦେଲ ସ୍ବର୍ଗର ସନ୍ଧାନ ll

ସ୍ଵପ୍ନ ସବୁ ଭାସି ଚାଲିଥିଲା

କାଳର କରାଳ ଭିତରେ ,

ଧୂଆଁଳିଆ ବାଦଲ ଉହାଡୁ

ଉଙ୍କି ମାରି ହସୁଥିଲା ଜହ୍ନ

ନିଲଜି ଓଠଚପା ହସ ଭିତରେ ll

ବକ୍ଷର ଉନ୍ମାଦନା,

ଦେହର ବାସ୍ନାରେ ବିଭୋର

ମତ୍ତହସ୍ତୀ ଭଳି କାମନା ନିଆଁରେ

ସ୍ବତଃଦହନ ହେଉଥିବା

ଏକ ପାଗଳପ୍ରାୟ ଦାନବର ,

ନିର୍ଝର ହସ୍ତାକ୍ଷର ll

ନିଜେ ଢେର୍ ଜଳିଛ

ମୋତେ ଆଲୋକିତ କରିବା ପାଇଁ ,

ନିନ୍ଦା ଅପବାଦ ସହିଛ

ମୋର ମଙ୍ଗଳ ପାଇଁ

ପ୍ରେରଣା ଦାୟିନୀ ମୋ ବାକସିଦ୍ଧା,

ନାରୀ ନୁହେଁ ତୁ ନାରାୟଣୀ ll

ଜୀବନେ ଭରିଛ ସାତରଙ୍ଗ,

ଅଧିକ ରଙ୍ଗୀନ୍ ହୋଇ ଉଠିଛି ,

ତୁମ ସ୍ନେହ ଶ୍ରଦ୍ଧା ପ୍ରେମ ପାଇ

ମୋ ଜୀବନ ମୋଡରେ ତୁମେ

ଇପ୍ସିତ ନାୟିକା

ଅବାଞ୍ଛିତ ପ୍ରାପ୍ତି ll

ତୁମ ବିନା

ଶୂନ୍ୟ ଶୂନ୍ୟ ମହାଶୂନ୍ୟ

ପୂର୍ଣ୍ଣତାର ତୁମେ ମହାଦ୍ରୁମ ,

କାମଧେନୁ ମୋ ପାଇଁ

ବଞ୍ଚିବାର ନାହିଁ ପ୍ରୟୋଜନ

ତୁମେ ନ ଥିଲେ ଅସାର ଜୀବନ,

ଧନ୍ୟ ନାରୀ ତୁମେ ଧନ୍ୟ ll