ମୋ ନାମ ହଳଦୀବସନ୍ତ

ଆସ ଆସ ପିଲେ ଦେଖିବ କିଏ l

    ହଳଦୀ ରଙ୍ଗର ଚଢ଼େଇ ଟିଏ ll

ସୁନ୍ଦର ଥଣ୍ଟ ତା ହିଙ୍ଗୁଳ ବୋଳା l

   ମଥାରେ ପିନ୍ଧିଛି ଟିପାଏ କଳା ll 

ନହକା ନହକା ଗୋଡ଼ ଦୁଇଟା l

   ସୁସ୍ୱରେ ରାବଇ ବୁକୁଚା ଫିଟା ll

ଉଡ଼ି ଉଡ଼ି ବୁଲେ ଡାଳକୁ ଡାଳ l

   ଆମ୍ବ ଛୁରୀଅନା ତାଳ ତମାଳ ll

ହଳଦୀ ଡେଣା ତା କଜ୍ଵଳ ମିଶା l

   ଚୂତ ତରୁ ଡାଳେ ବାନ୍ଧିଛି ବସା ll

ବସା ଭିତରେ ତା ତିନି ଶାବକ l

   ଖୁଆଇ ଦିଅଇ ପତଙ୍ଗ ପୋକ ll 

ମାଆର ମମତା ଅମୂଲ୍ୟ ସିନା l

   ମାଆ ପରି ଆଉ କିଏ ଅଛିନା ll 

ଖଣ୍ଡି ଉଡ଼ା ଦେବେ ଦିନ ଅଳପ l

  କେଉଁଆଡ଼େ ଗଲା ଛୁଆଙ୍କ ବାପ ll

ମାଙ୍କଡ଼ଟା ଆସି ସାଧିଲା ବାଦ

Advertisement

l

    ଚଢ଼େଇକି ପଡ଼ିଗଲା ପ୍ରମାଦ ll 

ନେହୁରା ହେଉଛି ବାନର ଭାଇ l

   ହାତଯୋଡ଼ି ବାଦ ନ କର ତୁହି ll 

ହଇରେ ପକ୍ଷୀ ତୁ କୁଆଡ଼େ ଥାଉ l

   ବସନ୍ତେ ବାସନ୍ତୀ ବାରତା ଗାଉ ll

ଆରେ ପକ୍ଷୀ ତୁହି କେଡ଼େ ସୁନ୍ଦର l

   ନାମ କହିବୁ କି ବିହଙ୍ଗ ତୋର ll

ଶୁଣ ଶୁଣ ଶୁଣ ଶୁଣରେ ଭାଇ l

   ମୋ ନାମ ହଳଦୀ ବସନ୍ତ କହି ll 

ଆମ୍ବ ବଉଳଇ ଫଗୁଣ ମାସେ l

   ବସନ୍ତ ବାରତା ଦେବାକୁ ଆସେ ll

ବ୍ୟୋମଚାରୀ ମୁହିଁ ମୁକ୍ତ ବିହଙ୍ଗ l

   ଆହାର ମୋ ଫଳ ପୁଷ୍ପ ପତଙ୍ଗ ll 

ଉଡ଼ି ବୁଲେ ତରୁ ଲତା କାନନ l

   ନମଃ ନମଃ ପ୍ରଭୁ ବିଶ୍ଵ ଜୀବନ ll