ଜୟ ପ୍ରଭୁ ଭୋଳାନାଥ

          ଜୟ ପ୍ରଭୁ ଭୋଳାନାଥ
           ============
ଜୟ ଜୟ ଜୟ ପ୍ରଭୁ ଜୟ ଭୋଳାନାଥ । ଭୋଳାପଣ କିଏ ତୁମ୍ଭ ପାଇବ ବା ଅନ୍ତ ।। ଗାଥା ତୁମ୍ଭର ପ୍ରଭୋ ମୁଁ ଶୁଣିଛି ପୁରାଣେ । ଘୋର ତପ କଲା ଭସ୍ମାସୁର ଏକ ଦିନେ ।। ତାଉପରେ ତୋଷହୋଇ ପ୍ରଭୁ ଆଶୁତୋଷ । ବରଦେଲ ଭସ୍ମା ହେଲା ଅତୀବ ସନ୍ତୋଷ ।। ଯାହା ଶିରେ ହାତଦେବ ହେବ ସେହି ଭସ୍ମ । ବର ପାଇ, ଭସ୍ମା ତହୁଁ, କଲା ଅଟ୍ଟହାସ୍ୟ ।। କୁହ ଆହେ ଭୋଳାନାଥ ସତ୍ୟକି ଏ ବର ? ପ୍ରଥମ ପରୀକ୍ଷା ନେବି ମୁଁ ଏବେ ତୁମ୍ଭର ।। ଏହା କହି ଭସ୍ମା ଉଠାଇଲା ଯେଣୁ ହାତ । ତ୍ରିପୁର ଭ୍ରମିଲ ପ୍ରଭୁ ହୋଇ ଭୟଭୀତ ।। ବିଷ୍ଣୁ ଶେଷେ ଯାଇ ପୁଣି ଭସ୍ମାକୁ ଭଣ୍ଡିଲେ । ଚତୁର ବାକ୍ୟରେ ତାକୁ ଚତୁରେ କହିଲେ ।। ଶୁଣ ଶୁଣ ଶୁଣ ଆରେ ତୁହି ମୁର୍ଖ ଦୈତ୍ୟ । ଶିବଙ୍କର ବର କାହିଁ ହୋଇଛି କି ସତ୍ୟ ।। ଭୂତ ପ୍ରେତ ସଙ୍ଗେ ନେଇ ନିତ୍ୟ ବୁଲୁଥାଇ । ଶ୍ମଶାନରେ ବାସକରେ ଭସ୍ମ ବୋଳିହୋଇ ।। ଭଣ୍ଡି ଦେଇଅଛି ତୋତେ ଭଣ୍ଡ ଭୋଳାନାଥ । ପରୀକ୍ଷା କର ତୁ ଦେଇ ନିଜ ଶିରେ ହସ୍ତ ।। ବିଷ୍ଣୁଙ୍କ ବାକ୍ୟରେ ଭୁଲି ତହୁଁ ଭସ୍ମାସୁର ।
ହସ୍ତ ରଖି ଭସ୍ମ ହେଲା କ୍ଷଣିକ ଭିତର ।। ମହା ସଙ୍କଟରୁ ତହୁଁ ତରିଲେ ଶଙ୍କର ।
ସେ ପ୍ରଭୁ ଭୋଳାନାଥଙ୍କୁ କୋଟି ନମସ୍କାର।। କଥା ରହିଗଲା ଅପାତ୍ରରେ ଦେଇ ଦାନ । ଅରକ୍ଷ ହୋଇ ଭ୍ରମିଲେ ପ୍ରଭୁ ପଞ୍ଚାନନ ।। ଭୋଳେ ପୁଣି ପାନ କଲ ଗରଳ ଆକଣ୍ଠ । ସଂସାରରକ୍ଷଣ ଅର୍ଥେ ତୁମ୍ଭେ ନୀଳକଣ୍ଠ ।। ସ୍ୱାର୍ଥ ତ୍ୟାଗୀ ଶିକ୍ଷାଦେଲ ପ୍ରଭୁ ସଂସାରକୁ । ନମସ୍ତେ ସେ ମହାଦେବ ସଂସାର ସାରଙ୍କୁ ।। ଜୟ ଜୟ ଭୋଳାନାଥ ଜୟ ଊମାପତି । ଶୁଭ ପ୍ରଭାତରେ ପ୍ରଭୁ କରେ ତୁମ୍ଭ ସ୍ତୁତି ।। 
             🙏🙏🙏
                 ଅର୍ଜ୍ଜୁନୀ
              ------------
ଅର୍ଜୁନୀ ଚରଣ ବେହେରା
ମୋ -୭୬୯୩୦୯୧୯୭୧