ମୋ ମାମୁଁ ଘର
ମୋ ମାମୁଁ ଘର
ମୋ ମାମୁଁ ଘର ଅନତିଦୂର
ଦେଖିବାକୁ ଘର ଚାଳ ଛପର ।
ଝରୁ ଥାଏ ଖୁସି ସୁଖ ସଂସାର
କିଣି ନ୍ୟନ୍ତି ସିଏ ସବୁ ଅନ୍ତର ।
ଆଜା ଆଈ ସାଥେ ମାମୁଁ ମାଇଁ ଥାନ୍ତି
କରୁଥାନ୍ତି ସିଏ କ୍ଷୀର ବେପାର ।
ମୋ ମାମୁଁ ଘର ଅନତିଦୂର ।
ଦଶନ୍ଦି ଖଞ୍ଜାଟି ମୋ ମାମୁଁ ଘର
ଝାଟିମାଟି ଘର ଆହାଃ କି ସୁନ୍ଦର ।
ଚାରି ପାଖେ ଘର ମଝି ଦୁଆର
ଅଗଣାଟି ତାଙ୍କ ଭାରି ସୁନ୍ଦର ।
ଅଗଣା ଆଗରେ ଦୋଳି ହେଇଥାଏ
ଝୁଲୁ ଥାଉ ଗୀତ ଗାଇ ମଧୁର ।
ମୋ ମାମୁଁ ଘର ଅନତିଦୂର ।
ଲିପା ପୋଛା ଘର ଦିଶେ ସୁନ୍ଦର
ଯିଏ ଦେଖେ ଲାଖି ଯାଏ ନଜର ।
ଫସଲ କରନ୍ତି କେତେ ପ୍ରକାର
ସୁନ୍ଦର ଦିଶଇ ମକା ଚଅଁର ।
ଚାଳରୁ ଝରଇ ବରଷାର ପାଣି
ଦୁଆରେ କାଦୁଅ ହୁଅଇ ଝର ।
ମୋ ମାମୁଁ ଘର ଅନତିଦୂର ।
ନାଲି ରଙ୍ଗ ମାଟି କଜଳ ଗାର
କାନ୍ଥେ ଝୋଟି ଦ୍ୟନ୍ତି କି ମନୋହର ।
ପଦୁଅଁ ପୋଖରୀ ଭାରି ସୁନ୍ଦର
ସୁରୁଯ ଅନାଇଁ ଥାଏ ଅମ୍ବର ।
ଧଳା,ନାଲି, ନୀଳ ,ହଳଦିଆ କଇଁ
ଦେହେ ବସି ଚୁମୁ ଥାଏ ଭ୍ରମର ।
ମୋ ମାମୁଁ ଘର ଅନତିଦୂର ।
ଲାଉ ଖେଳ ଖେଳୁ ମାମୁଁ ପିଠିର
ମାଇଁ କରୁ ଥାନ୍ତି ସ୍ନେହ ଆଦର ।
ଆଈ ପାରି ଦ୍ୟନ୍ତି ବେଣୀ ସୁନ୍ଦର
ମଜା ଲାଗେ ଢଗ ଟାହି ଟାପର ।
ମାଇଁ ହାତ ରାନ୍ଧା କ୍ଷୀରି, ପୁରି, ପିଠା
ଭଲ ଲାଗେ ମଣ୍ଡା ସେ ଛେନାପୁର ।
ମୋ ମାମୁଁ ଘର ଅନତିଦୂର ।
ମାମୁଁ ଘର ବାରି ଭାରି ସୁନ୍ଦର
ଫୁଲ ବଗିଚାଟି କି ମନୋହର ।
ଘର ଅଗଣାରେ ବହେ ସମୀର
ବାଇ ଚଢେଇଟି ତାଳ ଗଛର ।
ବରତା ଦେହରେ ବସା ବାନ୍ଧି ଝୁଲେ
ଆଖି ଦୋଟି ତାର କେଡେ ସୁନ୍ଦର ।
ମୋ ମାମୁଁ ଘର ଅନତିଦୂର ।
ବାଡେ ଅପରାଜିତା ମାଡେ ସୁନ୍ଦର
ମାନ ଅଭିମାନ ନାହିଁ କାହାର ।
ଏକତା ଅଟଇ ତାଙ୍କ ସଂସ୍କାର
ସତେକି ସେ ଘର ସରଗପୁର ।
ମିଳିମିଶି ସବୁ ଏକାଠି ରୁହନ୍ତି
କଥା କହୁଥାନ୍ତି କେଡେ ମଧୁର ।
ମୋ ମାମୁଁ ଘର ଅନତିଦୂର ।
ପାହାଡ ପର୍ବତ ଦିଶେ ସୁନ୍ଦର
ପାଖରେ ରହିଛି ଶିବ ମନ୍ଦିର ।
ଆମ୍ବ ତୋଟାମାଳ କେତେ ସୁନ୍ଦର
ଗାଆଁ ମଣ୍ଡପରେ ରହିଛି ବର ।
ବରଗଛ ତଳେ ଆଶ୍ରୟ ନିଅନ୍ତି
କେତେ ପଶୁ ପକ୍ଷୀ ଏଇତ ନର ।
ମୋ ମାମୁଁ ଘର ଅନତିଦୂର ।
କିଏ ବୁଲି ଯିବ ମୋ ମାମୁଁ ଘର
ଖାଇ ଆସିବ ତ ଲବଣୀ ସର ।
ଦେଖିବ ମୋ ମାଇଁ ସ୍ନେହ ଆଦର
କେତେ ଆପଣାର ସିଏ ନିଜର ।
ଶଗଡ ଗାଡିରେ ଆମେ ତ ଯାଉଛୁ
ଯିଏ ଯିବ ଶୀଘ୍ର ହୁଅ ବାହାର ।
ମୋ ମାମୁଁ ଘର ଅନତିଦୂର ।