ମୋ ଗାଁ କଥା
ମୋ ଗାଁ କଥା
ଏ ଗାଁ ମୋର ମାଆଟି,(୨ଥର)
ଚତୁଃପାର୍ଶ୍ଵରେ ଚତୁଃ ତଟିନୀ
ବଢାଏ ଯାର ଶୋଭାଟି
ଏ ଗାଁ ମୋର ମାଆଟି।(0)
ଦୂର ଦିଗବଳୟେ ସୁରୁଜ ଉଇଁଲେ
ନାନାରଙ୍ଗେ ପକ୍ଷୀ ଉଠନ୍ତି ସକଳେ।
ଆଃ, କି ସୁନ୍ଦର ପରୀ ରାଇଜ
ଚତୁଃପାର୍ଶ୍ଵରେ କ୍ଷେତ ସବୁଜ
ସବୁ ମୋର ଏଠି ପ୍ରିୟଟି
ଏ ଗାଁ ମୋର ମାଆଟି।(୧)
ବିଚ୍ଛୁରି ପଡ଼ିଲେ ଜହ୍ନ ଜୋଛନା
ଲାଜେ ଲୁଚିଯାଏ କଇଁ ଲଳନା ।
ସରସୀଜଳ ଶୀତୁଆ ସଞ୍ଜ
ଭସାଣିମେଘ ନବବଧୂର ଲାଜ
ଭାରି ମନଲୋଭା ଏଇଠି
ଏ ଗାଁ ମୋର ମାଆଟି।(୨)
ପୂରୁବ ଦିଶାରେ ଜାଗୁଳାଇ ମା
ପଶ୍ଚିମରେ ଭୋଳାନାଥ ଯେ ସାହା।
ମଝିରେ ଉଭା କାଳି ମନ୍ଦିର
ବିପଦେ ସାହା କଳା ଠାକୁର
ମନ୍ଦିରମାଳିନୀ ମୋ ଗାଁ ଟି
ଏ ଗାଁ ମୋର ମାଆଟି। (୩)
ଦେବ ମନ୍ଦିର ଗାଁ ମଣ୍ଡପ
ଗ୍ରାମବାସୀଙ୍କ ଧରମପୀଠ ।
ସଞ୍ଜ ଦେଉଳ ଆଳତୀ ବେଳ
ମେଳାଭଜନ ମୃଦଙ୍ଗତାଳ
ଗାଆଁ ଗଉରବ ସେଇଟି
ଏ ଗାଁ ମୋର ମାଆଟି ।(୪)
ହଳିଆ ଭାଇର ହଳ ଲଙ୍ଗଳ
ଝାଟିମାଟି ଭରା ଚାଳଛପର ।
ପଖାଳକଂସା ଆମ୍ବବଉଳ
ତୁଠଗାଧୁଆ ବରଓହଳ
ଦିଏ ମୋ ଜୀବନେ ରାହାଟି
ଏ ଗାଁ ମୋର ମାଆଟି। (୫)
ଗୁଣ୍ଡୁଣୀ ଦିନ ଗାଁ ବଣଭୋଜି
କେଜାଣି ମନେ ପଡୁଛି ଆଜି ।
ରାମନବମୀ ରଥ ଯାତରା
ରଜ ପାନ ସଙ୍ଗେ ଦୋଳି ଆସରା
ଏକାଠି କରେ ଜାତିକି
ଏ ଗାଁ ମୋର ମାଆଟି ।(୬)
ତା ବୁକୁ ଦେଇଛି ଅମୃତ ସନ୍ଧାନ
ତା ମାଟି ମୋପାଇଁ ଚନ୍ଦନ ସମାନ ।
ଏଇଠି ଅଛି ମୋ ଏନ୍ତୁଡ଼ିଶାଳ
ଏଇଠି ହେବ ମୋ ଅନ୍ତ୍ୟେଷ୍ଟିଘର
ନ ଭୁଲିବି ତାକୁ ମନୁଟି
ଏ ଗାଁ ମୋର ମାଆଟି। (୭)
ଯା ପାଣି ପବନେ ଗଢା ମୋ ଶରୀର
ଯେଉଁଠି ଅଛନ୍ତି ଆତ୍ମୀୟ ସୋଦର।
ମୋ ଗାଁର ଗାଥା, ବୁଢୀମା କଥା
ମନେ ପଡ଼ିଲେ ଆସଇ ବ୍ୟଥା
ତା'ଠାରୁ ବଡ଼ କେ ନାହିଁଟି
ଏ ଗାଁ ମୋର ମାଆଟି। (୮)
"ଛୋଟ ମୋର ଗାଁଟି"
ସ୍ୱର ଆଧାରରେ ମୋର ଛୋଟ ପ୍ରୟାସ।