🥦🌹ମୋ ଗାଆଁ ।🌹🥦 🥦❤🙏❤🥦

ଗାଆଁ ପରିବେଶ ଗାଆଁର ଚଳଣୀ 

     କେତେ ଭଲ ଲାଗେ ସତେ

ସବୁଜ ସୁନ୍ଦର ସୁନେଲି ଫସଲ

     ଢେଉ ଖେଳୁଥାଏ କ୍ଷେତେ ।

ଚାରି ପାରୁଶରେ ଗଛ ଲତା ଭରା

     ଧାନ ବିଲ ଶୋଭା ପାଏ

ତାଳ ଗଛ ଭରା ଆମ୍ବ ତୋଟା ମାଳେ 

    ଗାଁ ସୁନ୍ଦର ଦିଶୁ ଥାଏ ।

ରଙ୍ଗ ମାଟି ଲିପା ଛଣ ଛପରରେ

    ଘର କି ସୁନ୍ଦର ଦିଶେ

ଘର ଅଗଣାରେ ମଳୟ ବହଇ

    ଆକାଶେ ବଉଦ ଭାସେ ।

ଗାଆଁ ପୋଖରୀଟି କଇଁ ଫୁଲ ଫୁଟି 

    କି ସୁନ୍ଦର ଦେଖାଯାଏ

ବରଷା ହୋଇଲେ ଚାଳ ଛପରରୁ 

    ପାଣି ଟୋପା ପଡୁ ଥାଏ ।

ଗାଆଁର ଦାଣ୍ଡରେ ବରଷାର ପାଣି 

    ଗୋଳି ହେଇ ବୋହି ଯାଏ

ରଙ୍ଗ ବେରଙ୍ଗର କାଗଜର ଡଙ୍ଗା 

    ତା ଦେହରେ ଭାସୁ ଥାଏ ।

ପୁରୁଣା ଖାତାକୁ ଚିରି ପିଲାମାନେ 

     କାଗଜ ଡଙ୍ଗା କରନ୍ତି 

ଧାଇଁ ଯାଇ ପାଣି ସୁଅର ମଝିରେ

      ଭସେଇ ଦେଇ ଆସନ୍ତି ।

ଗାଆଁରେ ପୋଖରୀ ଗାଆଁରେ ମନ୍ଦିର 

      ଗାଆଁରେ ମଶାଣୀ ଥାଏ

ଗାଆଁର ଜଙ୍ଗଲ ଆମ୍ବ ତୋଟାମାଳେ

      ରଜ ଦୋଳି ଖେଳା ଯାଏ । 

ଭାରି ଭଲ ଲାଗେ ପୋଖରୀ ଗାଧୁଆ

      ସେ କଇଁ ଫୁଲ ତୋଳିବା

ବିଲ ମାହଳର ପାଣିକୁ ବନ୍ଧେଇ

    ବାହିଣ ମାଛ ମାରିବା ।

ଆମ୍ବ ଜାମୁ କେନ୍ଦୁ କୋଳି କଇଁଆକୁ

    ଖାବୁଡରେ ଝଡେଇବା

କାନ୍ଧିଆ ବିଜୁଳି ଗଛରେ ଚଢିଣ

     ଡାଳରେ ବସି ଖାଇବା ।

ଗାଆଁରେ ସ୍କୁଲ୍ ଗାଆଁ ଗାଈ ଗୋଠ

     ଖେଳ ପଡିଆ ଯେ ଥାଏ

ଗାଆଁ ସନ୍ଧ୍ୟା କେତେ ମନଲୋଭା ସତେ

     ଆଖି ଝଲସେଇ ଦିଏ ।

ସନ୍ଧ୍ୟା ହେଇଗଲେ ହମ୍ବା ରଡି କରି

    ଗାଈ ଆସନ୍ତି ବାହୁଡି 

ଦୂର ଦେଶୁ ପକ୍ଷୀମାନେ ନଭେ ଡେଣା

      ଝାଡିଣ ଆସନ୍ତି ଉଡି ।

ଚଉରା ମୂଳରେ ଗାଆଁ ବୋହୁମାନେ 

     ସଞ୍ଜ ବତୀ ଯେ ଜଳାନ୍ତି 

ରାତି ଆସିଗଲେ ଖାଇ ପିଇ ଶାନ୍ତି

    ଭାବେ ସେ ଶୋଇ ଯାଆନ୍ତି ।

ଗାଆଁରେ କାହାର ବିପଦ ପଡିଲେ

    ସାହାଯ୍ୟ ତାକୁ କରନ୍ତି 

ଗାଆଁ ଯାନି ଯାତ୍ରା ମିଳିମିଶି ସବୁ

    କି ସୁନ୍ଦର ପାଳି ଥାନ୍ତି ।

ଗାଆଁ ବଣ ଭୋଜି ଭାରି ଭଲ ଲାଗେ

     ପିଲାମାନେ କରିଥାନ୍ତି 

ଅଗିରା ପରବ ହୋଲି ପର୍ବ ସତେ

     କି ସୁନ୍ଦର ପାଳୁ ଥାନ୍ତି । 

ରାତି ପାହିଗଲେ ଗାଆଁର ସକାଳେ

    କାଉ କାଆ କରୁ ଥାଏ

ଗଞ୍ଜା ରାବୁ ଥାଏ ହନୁ ଡେଉଁ ଥାଏ

     କେତେ ମଜା ଲାଗୁ ଥାଏ ।

ମୋ ଗାଆଁର ପାଣି ପବନର ମୋର

     ଏଇ ତ ଗଢା ଶରୀର 

ତା ପାଇଁ ଆଜି ଆମେ ତ ବଞ୍ଚିଛୁ 

    ତା ପାଦେ କୋଟି ଜୁହାର ।

ଗାଁ ସ୍ନେହ ମମତା ଗାଆଁର ସେ ସ୍ମୁତି 

     ସବୁଠୁ ବଡ ନିଆରା 

ଏଇ ଗାଆଁ ପାଇଁ ଏ ଜଗତ ହସେ 

    ହସୁଥାଏ ବସୁନ୍ଧରା ।